სპაგეტი ბოსტნეულით

საჭირო ინგრედიენტებია: 2 თავი ხახვი, 1 ცალი ყაბაყი, 2 ცალი სტაფილო, 3 ცალი პომიდორი, 1 კბილი ნიორი, 2 სადილის კოვზი ზეთი (სიმინდის ან ზეითუნის), 300 გრამი მაკარონი „სპაგეტი“, 1 კონა კამა, 50 გრამი გახეხილი ყველი, პილპილი და მარილი გემოვნებით.

მომზადების წესი: ყაბაყი გათალეთ და დაჭერით პატარა კუბიკებად. ხახვი წვრილად დაკეპეთ. სტაფილო გარეცხეთ და დაჭერით პატარა ნაჭრებად. პომიდორი გარეცხეთ, ჩადეთ მდუღარეში, გააცალეთ კანი და რბილობი მსხვილად დაჭერით. ტაფაზე გააცხელეთ ზეთი. მოშუშეთ მასში ჯერ ყაბაყი, მერე ხახვი და ბოლოს – სტაფილო. კარგად რომ ჩაიშუშება, მოასხით პომიდორი, მოაყარეთ მარილი და პილპილი.

მაკარონი „სპაგეტი“ მოხარშეთ მდუღარე მარილწყალში. ცხელივე გადმოიღეთ ლანგარზე, ზემოდან მოასხით ბოსტნეულის სოუსი, მოაყარეთ გახეხილი ყველი და წვრილად დაჭრილი კამა.