17 ივნისს ირაკლი ნასიძის ჩვენებას მშვენიერი ამინდი დაემთხვა. ყოველ შემთხვევაში, შემოდგომა-ზამთრის კოლექციის ჩვენება ორმოცგრადუსიან სიცხეში არ მომხდარა. ღრუბელი, ოდნავ წვიმა, ლამაზი შუშის ხიდი, ულამაზესი გოგონები – ყველაფერი ეს დეფილესთვის არაჩვეულებრივ ატმოსფეროს ქმნიდა. თუმცა, მთავარი მაინც სამოსი იყო, რომელიც მშვიდობის თემას მიეძღვნა. აგვისტოს ომის დროს ირაკლი საქართველოში იმყოფებოდა და ძალიან მტკივნეულად განიცადა ყველაფერი, რაც ჩვენ ქვეყანაში დატრიალდა. ეს, რა თქმა უნდა, ხელოვანის შემოქმედებაზეც აისახა და შეიქმნა კოლექცია მშვიდობის თემაზე, რომელიც საფრანგეთში როგორც შემოდგომა-ზამთრის კოლექცია ისე წარდგება. ჩვენებას ძალიან ბევრი ცნობილი ადამიანი ესწრებოდა, რომლებმაც კიდევ ერთხელ გაიხსენეს აგვისტოს მოვლენები.