გერმანიის საკონსტიტუციო სასამართლოში, სულ მცირე, 3 სარჩელი შევიდა მოთხოვნით – უკანონოდ ცნონ ბუნდესთაგისა და ბუნდესრატის მიერ ქვეყნის მთავრობის გადაწყვეტილების დამტკიცება, რომელიც საერთო ევროპული ვალუტის მხარდასაჭერად შექმნილი სტაბილიზაციის ფონდისთვის 148 მილიარდი ევროს გამოყოფას გულისხმობს. მოსარჩელეები უკანონოდ მიიჩნევენ ევროს სტაბილიზაციის საერთო ევროპული ფონდის შექმნას, რადგან თანმხლები კანონი, რომელიც გერმანიის პარლამენტის ევროპულ საქმეებში მონაწილეობას განსაზღვრავს, ფედერაციული რესპუბლიკის კონსტიტუციას ეწინააღმდეგება. ის ქვეყნის ხელისუფლებას, ფაქტობრივად, შესაძლებლობას ართმევს, გავლენა მოახდინოს საერთო ევროპული მასშტაბის ფინანსურ გადაწყვეტილებებზე. ერთ-ერთმა მოსარჩელემ სასამართლოსგან დროებითი გადაწყვეტილების მიღებაც კი მოითხოვა, რომლის ძალითაც ანგელა მერკელის მთავრობას ევროს სტაბილიზაცოს ფონდისკენ თანხის მიმართვა აღარ შეეძლებოდა. საინტერესოა, რომ ქალაქ კარლსრუეშის საკონსტიტუციო სასამართლომ 2010 წლის მაისში უარი თქვა მსგავსი სარჩელების მიღებაზე, რომელიც გერმანიის მთავრობის, ბუნდესთაგისა და ბუნდესრატის წინააღმდეგ იყო მიმართული და საბერძნეთისთვის გამოყოფილი მრავალმილიარდიანი დახმარების უკანონოდ აღიარებას მოითხოვდა.