გაყრა ინგლისურად
ცუდი კი არაფერი იფიქროთ, უბრალოდ, ლონდონის „ჩელსის“ ფეხბურთელი ეშლი კოული და მომღერალი შერილ ტვიდი ერთმანეთს შორდებიან. შერილმა ეშლი ღალატში რამდენჯერმე გამოიჭირა, გაყრაზე განცხადება შეიტანა და ისიც თქვა, ჩემი ფულიც მეყოფა, ეშლისგან არაფერი მინდაო. სასამართლომ კი დაადგინა, რომ ქალს ქმრისგან ოთხი მილიონი ევრო მაინც ერგება და კოულიც ვალდებული იქნება, ეს თანხა გადაიხადოს.
შერილმა კი ცეცხლზე ნავთი დაასხა და პარიზში გაემგზავრა. მისი ვოიაჟები ჩვეულებრივი ამბავია, მაგრამ ტვიდმა ამჯერად თავისი ჯგუფის მოცეკვავე, დერეკ ჰოუგი იახლა და კოული გადაირია, აქაოდა, როცა ცოლი მე ღალატში მდებდა ბრალს, თავადაც მღალატობდა, თორემ, ასე მალე რომანს როგორ გააჩაღებდაო. შერილმა კი მშვიდად თქვა, დერეკი უბრალოდ, ჩემი მეგობარია და მძიმე წუთებში გვერდით მიდგას, ჩვენს რომანზე საუბარი ზედმეტიაო, თუმცა სიყვარულის ქალაქში დასამშვიდებლად კაცს რომ წაიყვან, ცოტა არ იყოს, საეჭვოა.