უეფას დისციპლინარულმა კომიტეტმა 2008 წელს მიუნხენის „ბაიერნის“ შესაძლო მოსყიდვის საქმის ხელახალი გამოძიება შეიძლება დაიწყოს. საქმე ეხება უეფას თასის საპასუხო ნახევარფინალურ მატჩს, რომელშიც სანკტ-პეტერბურგის „ზენიტმა“ „რეკორდმაისტერი“ 4:0 დაამარცხა და გათამაშებას გამოთიშა. შემდგომში კი, რუსებმა თასი აღმართეს.

მიმდინარე წლის 30 აპრილს უეფას წარმომადგენლები ესპანეთის პროკურატურის გამომძიებლებს შეხვდნენ, რომლებიც ზემოხსენებული საქმის გარემოებებს იძიებენ. საფეხბურთო ჩინოვნიკები გამოძიების დეტალებს გაეცნენ. კერძოდ, გამომძიებლებმა უეფას სატელეფონო ჩანაწერი წარუდგინეს, რომელშიც რუსული კრიმინალური დაჯგუფების ორი ხელმძღვანელი საუბრობს. საუბარი იმ 50 მილიონ ევროს ეხება, რომელიც თითქოს „ბაიერნს“ გადაუხადეს.

ამასთან, გერმანული კლუბის მოსყიდვასთან დაკავშირებით ოფიციალურად სისხლის სამართლის საქმე აღძრული არ არის, რადგან ამ საკითხთან მიმართებაში პირდაპირი სამხილები ჯერჯერობით არ არსებობს.