ევროზონის სახელმწიფოებმა ფინანსურ ბაზრებს ერთგვარი შეტყობინება გაუგზავნეს, რომლის მიხედვითაც კარგად ჩანს, რომ ისინი კვლავაც გააგრძელებენ ინტეგრაციას – მათ ერთობლივი გადაწყვეტილება მიიღეს ფრანკფურტში ევროპის ცენტრალური ბანკის ახალი შტაბ-ბინის აშენების შესახებ, რომლის ღირებულებაც 850 მილიონი ევრო იქნება. ამჟამად ეს ბანკი გერმანიის ფინანსურ ცენტრში, ფრანკფურტში, 1970-იან წლებში აშენებულ ევროკოშკშია იჯარით განთავსებული. 1994 წლამდე ევროკოშკში ევროპის ცენტრალური ბანკის წინამორბედი – ევროპის სავალუტო ინსტიტუტი საქმიანობდა. როგორც პრესა აღნიშნავს, დღესდღეობით ევროპის უმთავრესი ბანკი მსოფლიოში ერთადერთი ცენტრალური ბანკია, რომელთან ერთადაც, ერთ შენობაში, რესტორანი, ბარი და ღამის კლუბი არსებობს. ევროპის ცენტრალური ბანკის ახალი შტაბ-ბინა ორ კოშკში განთავსდება, რომლებიც 41 და 44-სართულიანი იქნება. მათ საერთო ქვედა ნაწილი ექნებათ, სადაც საკონფერენციო ცენტრი განლაგდება. ამჟამად ევროპის უმთავრესი ბანკის თანამშრომელთა რაოდენობა 1 800-ს უახლოვდება, მომავალი შტაბ-ბინა კი 2 200 ადამიანზეა გათვლილი. სავარაუდოდ, ევროზონის ცენტრალური ბანკი ახალ შენობაში 2014 წლისთვის გადავა.