ჩინელ ოლიგარქ ხუან გუანიუს, რომელმაც ელექტროტექნიკის მაღაზიათა იმპერია „გომ ელექტრიკალ ეპლაიანსი“ შექმნა და რომლის სიმდიდრეც 6,3 მილიარდ დოლარად არის შეფასებული, 14-წლიანი პატიმრობა მიუსაჯეს. მას ბრალად კორუფცია და საიდუმლო ინსაიდერული ინფორმაციის გამოყენება წაუყენეს. პატიმრობის გარდა, ჩინელ მილიარდერს ჯარიმის – 88 მილიონი დოლარის გადახდაც დააკისრეს. ხუან გუანიუ დამნაშავედ ცნეს ჩინოვნიკებისთვის ქრთამის არაერთგზის მიცემაში, რის შედეგადაც მისი კომპანია მნიშვნელოვანი შეღავათებით სარგებლობდა. როგორც გამოძიებამ დაადგინა, ჩინელი ოლიგარქი არა მარტო თავად გასცემდა ქრთამებს, არამედ სხვებსაც ამ გზით სარგებლობას ურჩევდა. როგორც სასამართლო პროცესზე გაირკვა, მილიარდერმა ხუთი მაღალჩინოსნის მოსყიდვა მოახერხა, რომლებსაც ქრთამად 700 ათასამდე დოლარი გადასცა. გარდა ამისა, გუანიუ საიდუმლო ინსაიდერულ ინფორმაციასაც უკანონოდ იყენებდა გამდიდრების მიზნით. იგი კომპანია „ბეიჯინგ სენტრგეიტ ტექნოლოჯის“ უმსხვილესი აქციონერი იყო და ამ კომპანიის აქციებით ვაჭრობდა, რომელთა საერთო ღირებულებაც 208 მილიონ დოლარს აღწევდა. ხუან გუანიუ 2005 წლიდან 2008 წლამდე უმდიდრესი ჩინელი იყო.