როგორც ეზოთერიკოსები ამბობენ, ბუნებაში უკვალოდ არაფერი ქრება და ერთხელ შექმნილი გენეტიკური კოდიც არ ისპობა. ის რამდენჯერმე მეორდება და ბრუნდება დედამიწაზე სხვადასხვა ადამიანის სხეულში. ასევე, სახლში არსებობს ისეთი პათოგენური ზონები, რომლებიც ადამიანებს დიდ საფრთხეს უქმნის და შესაძლოა, მათი სიკვდილის მიზეზიც კი გახდეს.

როგორც დღევანდელი რუბრიკის რესპონდენტი, ქალბატონი მედეა ამბობს – რაც ადამიანს უწერია, ის არ ასცდება. მკვლელობა, თვითმკვლელობა და ამა თუ იმ დაავადების მიზეზიც კი შესაძლოა, სწორედ ადამიანის დაბადების მომენტში „ზემოდან“ ნაკარნახევი და დაწერილი კანონი იყოს.



მედეა: ყოველთვის ვამბობ, რომ ბუნებაში უკვალოდ არაფერი ქრება. ერთხელ შექმნილი გენეტიკური კოდი აღარ ისპობა. ის რამდენჯერმე მეორდება დედამიწაზე სხვადასხვა ადამიანის სხეულში. თუმცა, არ არის აუცილებელი, ყოველთვის ადამიანში განმეორდეს. შეიძლება, ფრინველის, ცხოველის, მცენარის ან ისეთი არსების სხეულშიც მოხვდეს, რომლის შესახებ ჯერ არც კი გვსმენია მოკვდავებს. ამგვარი ჰიპოთეზა ამქვეყნად მიმდინარე მოვლენების ლოგიკური ანალიზია. პარალელური ტორსიული ველების არსებობა კი დღეს უკვე ჩვენ გაოცებას აღარ იწვევს. ცნობილი ფაქტია, რომ სიკვდილის წინ ადამიანები ხშირად გარდაცვლილი ადამიანების გამოცხადებას ხედავენ. ზოგჯერ იმქვეყნად წასული სულები ცოცხლებს სიზმრად თავისთან იხმობენ. ყოფილა შემთხვევა, როცა ძილში მიცვალებულს უკან გაყოლილი ადამიანი, ცხადშიც მალევე გარდაცვლილა. ეს ყველაფერი ბევრისთვის ამოუცნობი, ბევრისთვის მიუღებელი და დაუჯერებელია, მაგრამ ფაქტია, ასეთი რამ მართლაც ხდება და ამის უარყოფა, უბრალოდ, უაზრობა და თავის მოტყუებაა.

– პირად საუბარში აღნიშნეთ, ადამიანს თავისი ბედისწერა დაბადების დღიდან მოჰყვება. მას „ზემოთ“ წერენ და ამას ვერავინ ავცდებითო. იქნებ, უფრო გასაგებად ამიხსნათ, რას გულისხმობდით?

– მართალია, ვთქვი და ყოველთვის ვიტყვი, რომ ადამიანს რაც უწერია, ის არ აცდება. ჩემი აზრით, ყველა ჩვენი ფიქრი კოსმოსში მიდის, იქ ხარისხდება ცუდ და კარგ კატეგორიებად და იწერება ჩვენი ცხოვრების ფურცლებზე. ადამიანის სხეულის სიკვდილის შემდეგ, ენერგეტიკული კოდი ორმოცი დღის განმავლობაში დედამიწაზე რჩება. აგროვებს გარშემო მყოფთა შესახებ ინფორმაციას და ამის შემდეგ ტოვებს დედამიწას. მისი ხელმეორედ მოსვლისთვის ბედისწერა წარსული ცხოვრების შედეგის მიხედვით იწერება, ანუ, როგორც წინა ცხოვრებაში იქცეოდა, იმის მიხედვით მიიღებს სამაგიეროს მეორედ მოსვლისას. მაგრამ, თუ ადამიანი თვითმკვლელობით ასრულებს სიცოცხლეს, მაშინ მისი დედამიწაზე მეორედ მოსვლისას, ფიზიკური დეფექტით იბადება. ნუ დაგვავიწყდება, რომ ამქვეყნად, ყველას თავისი მისია ეკისრება და ის ცხოვრების ბოლომდე უნდა შევასრულოთ. ყოველ შემთხვევაში, ვეცადოთ მაინც.

– თქვით, რომ ადამიანის გარდაცვალების შემდეგ, მისი ენერგია ოჯახში ტრიალებსო. თუ ადამიანი სახლიდან შორს კვდება, ამ შემთხვევაში რა ხდება?

– ადამიანის სიკვდილის დროს, პირველად იღუპება მისი სხეული, მაგრამ შესაბამისი აპარატურა მის ენერგიას სახლში ორმოცი დღის განმავლობაში აფიქსირებს. ეს ხანგრძლივი კვლევის შედეგი და მეცნიერებისა და ეზოთერიკოსების მიერ დადასტურებული ფაქტია. ერთ მაგალითს დაგისახელებთ. კერძოდ, ახალგაზრდა ყმაწვილი, რომელიც უცხოეთში იყო სასწავლებლად წასული, უეცრად, გაურკვეველ ვითარებაში გარდაიცვალა. მისი ენერგია კი სპეციალურმა აპარატურამ სამშობლოში, მის სახლში დააფიქსირა. აქედან შეგვიძლია გამოვიტანოთ დასკვნა, რომ ენერგიისთვის მანძილი არ არსებობს და, შესაბამისად, არც გადაადგილებაა მისთვის პრობლემა. სიკვდილის დროს ხდება გენეტიკური კოდის გადასვლა ერთი მდგომარეობიდან მეორეში. ყველა ჩვენგანის კოდი სამყაროსთანაა დაკავშირებული. ანუ, უფრო გასაგებად რომ ვისაუბროთ, ადამიანს სამყაროში ამ კოდით იცნობენ და მისი გარდაცვალების შემდეგ, ეს კოდი ისევ აგრძელებს არსებობას, მაგრამ ჩვეულებრივ მდგომარეობაში მას ადამიანები ვერ ამჩნევენ. გეტყვით იმასაც, რომ ადამიანის გარდაცვალებამდე მისი კოდი გაცილებით ადრე იწყებს გარდასახვას.

– ეს როგორ გავიგოთ?

– ეს იმას ნიშნავს, რომ ფაქტობრივად, უახლოვდება წინა პერიოდში გარდაცვლილი ადამიანების ენერგეტიკულ მდგომარეობას და ერთმანეთთან დაკავშირების საშუალება ეძლევათ. სწორედ ეს იწვევს გარდაცვლილი ადამიანის ნახვას სიზმარში. ამიტომ ვამბობ ხოლმე, მიაქციეთ ყურადღება იმას, თუ რა მინიშნებას გაძლევენ ღამით ნანახი სიზმრები და იმქვეყნიდან სიზმრად მოვლენილი ახლობლები, კარგად გაიაზრეთ და გაითვალისწინეთ გარდაცვლილთა მინიშნებები.

– ამბობენ, ადამიანის უეცარი სიკვდილი, შესაძლოა, სახლში არსებულმა გეოპათოგენური ზონიდან წამოსულმა უარყოფითმა ენერგიამაც გამოიწვიოსო. ამაზე რა აზრის ხართ?

– შემიძლია, ფაქტები მოგიყვანოთ და თავად მიხვდებით, თუ რა საშიშია სახლში გეოპათოგენური ზონების გავლენა იქ მცხოვრებ ადამიანებზე. მოკლედ, ერთ-ერთ საცხოვრებელ სახლში მიიწვიეს ბიოლოგი, რომ ოთახებში გეოპათოგენური ზონების არსებობა შეემოწმებინა. მან კედლებთან ახლოს აღმოაჩინა ძლიერი გეოპათოგენური ზონა. მის მოპირდაპირე მხარეს კი ბავშვის საწოლი იდგა, სადაც ყველაფერი რიგზე იყო. მეცნიერმა მშობლებს აუხსნა, რომ კარგი ქნეს, საწოლი იმ ადგილას რომ დადგეს და არა მის საპირისპირო მხარეს. როგორც შემდეგ აღმოჩნდა, მშობლებიც კარგად ერკვეოდნენ მსგავს საკითხებში. მანამდე ბავშვის საწოლი თურმე სწორედ იმ ადგილას ედგათ, სადაც გეოპათოგენური ზონა იყო. ბავშვი იმ პერიოდში ხშირად ჭირვეულობდა, ავადმყოფობდა, უჭირდა დაძინება და ძილშიც არ იყო მშვიდად. ბევრ ექიმსაც გაასინჯეს პატარა, მაგრამ ავადმყოფობის მიზეზი ვერ დაუდგინეს. საწოლი გადააადგილეს თუ არა, მაშინვე დაიწყო ბავშვმა გამოჯანმრთელება, ძილის ხარისხიც გამოუსწორდა, დამშვიდდა და ჭირვეულობამაც გაუარა. ეს იმის მანიშნებელია, რომ გეოპათოგენური ზონები ძალიან საშიშია ადამიანისთვის. თუ დიდხანს დარჩით ასეთ ზონებში, შესაძლოა, მან ისეთი დაავადება გამოიწვიოს, რომლის გართულებას სიკვდილიც კი მოჰყვეს. ყველა მშობელს ვურჩევ, ამ მხრივ, განსაკუთრებული სიფრთხილე ბავშვების მიმართ გამოიჩინონ. აქვე გეტყვით, რომ ბავშვები ინტუიციით ხვდებიან და გრძნობენ მათთვის საშიშ ზონებს. მაგალითად, თუ ბავშვი ვერ იძინებს, ჭირვეულობს, ტირის და ცდილობს, საწოლიდან გადმოსვლას, ან ღამით იღვიძებს და ტირილს იწყებს, ესე იგი, კოშმარები ესიზმრება. მისი მოუსვენრობისა და კოშმარული სიზმრების მიზეზი კი სწორედ გეოპათოგენური ზონის მოქმედებაა. დღეს უკვე ბევრს საუბრობენ და მსჯელობენ იმ სავალალო შედეგებზე, რაც გეოპათოგენური ზონების მოქმედებას მოჰყვება. თუ გეოპათოგენური ზონა გადის სამზარეულოზე, ეს ძალიან საშიშია. მას შეუძლია, პროდუქტების ენერგია შეიწოვოს, ასეთი პროდუქტის მიღებამ კი ადამიანში უარყოფითი შედეგები გამოიწვიოს. საერთოდ, ბევრი რამაა დამოკიდებული ამა თუ იმ ველის სიმძლავრეზე. ზოგიერთი გეოპათოგენური ზონის ნეიტრალიზაცია შეიძლება, ზოგიერთის კი – არა. სხვათა შორის, შავი ენერგიის და მაგიის მიმდევარი ჯადოქრები სწორედ ისეთ გეოპათოგენურ ზონას იყენებენ პარალელურ სამყაროსთან ურთიერთობის დროს, რომლის განეიტრალებაც ძალიან რთულია. ველი იწოვს ადამიანის ცხოველქმედების უნარს, მაგრამ თუ ამ ზონას რამდენიმე მეტრით მოაშორებთ საწოლს, სამუშაო მაგიდას და ასე შემდეგ, მაშინ, გეოპათოგენური ენერგიის არ უნდა გეშინოდეთ.

– რა მანძილზე ვრცელდება საშიში ზონების არეალი?

– საერთოდ, გვხვდება ძლიერი გეოპათოგენური ზონებიც, რომელთა გავრცელების არეალი რამდენიმე კილომეტრიც კია. ასეთ ადგილს უნდა მოშორდეთ. სხვა გამოსავალი არ არის. გეტყვით იმასაც, რომ ყველაფერი დამოკიდებულია ზონის გავრცელების სიხშირეზე. ადამიანზე გეოპათოგენური ზონის დიდხანს მოქმედებამ შეიძლება, მძიმე დაავადებები გამოიწვიოს. გეოპათოგენური ზონის გავრცელება მოქმედებს ადამიანის ორგანიზმზე და უმეტესად იწვევს ონკოლოგიურ, მძიმე დაავადებებს. გეოპათოგენური ველი არა მარტო საცხოვრებელ ბინებშია. ეს ზონა ყველგან შეიძლება შეგხვდეთ და მისი ზემოქმედებისგან არავინაა დაცული. კარგად დააკვირდით, სად გრძნობთ თავს ცუდად, სახლის რომელ კუთხეში ხართ მოუსვენრად და ასე შემდეგ. ასევე, თუ ღამით ცუდად გძინავთ, შეუცვალეთ საწოლს ადგილმდებარეობა, რადგან შესაძლოა, თქვენ დიდი ხანია, გეოპათოგენური ზონის ქვეშ გძინავთ და ეს დიდ საფრთხეს შეგიქმნით მომავალში. ასე რომ, სანამ ურემი გადაბრუნდება და გზა მერე გამოჩნდება, გირჩევთ ჯერ გზას გახედოთ და მერე დაადგეთ მას.