ზალიკო სულაკაურის საპირველაპრილო გამოფენა
რამდენიმე წელია, რაც მხატვარმა-კარიკატურისტმა, ზალიკო სულაკაურმა ძალიან უცნაური ტრადიცია დაამკვიდრა და მსოფლიო „ტყუილის“ დღეს გამოფენის მოწყობა გადაწყვიტა. პირველ აპრილს მის გამოფენაზე ნახავდით ცნობილი ადამიანების კარიკატურებს, თუმცა ამჯერად მან ნამდვილი სიურპრიზი მოუწყო „დიდუბე პლაზაში“ მისულ დამთვალიერებლებს – და კარიკატურების ნაცვლად ფერწერული ნამუშევრები დაახვედრა, რამაც ყველა ძალიან გააკვირვა. ზალიკოს მხატვრულმა ტილოებმა და მისი პატარა მოსწავლეების ნამდვილმა „შედევრებმა“ საოცარი შთაბეჭდილება მოახდინა ყველაზე. სტუმრები აღფრთოვანებას ვერ მალავდნენ.
ზალიკო სულაკაური: ამჯერად მინდოდა, საპირველაპრილო ხუმრობად მნახველისთვის დამეხვედრებინა ცოტა არასტანდარტული სიურპრიზი. დამთვალიერებლები ელოდებოდნენ, რომ აქ ახალ კარიკატურებს ნახავდნენ, რეალურად კი ჩემი დიდი ხნის ფერწერული ნამუშევრები დავახვედრე. გამოფენამ დიდი მოწონება დაიმსახურა და ეს, რა თქმა უნდა, მახარებს.