წინ... წარმატებისკენ!
დავიწყოთ იმით, რომ ყველაფერი გამოვა! საქმეც და პირადი ცხოვრებაც. რა თქმა უნდა, ადვილი არ არის, წარმატებული ქალი გახდეთ და ბედნიერებაც თქვენი თანამგზავრი იყოს, მაგრამ წარმატება ისე არ მოდის. დასაწყისისთვის, გათავისუფლდით სტერეოტიპებისგან. იდეალურობამდე ბევრი გიკლიათ? – ეს სულაც არ არის ტრაგედია. არც არავინ მოგთხოვთ, იყოთ იდეალური. აუცილებელია, გქონდეთ საქმე, რომელსაც დროს და ენერგიას მოახმართ. დადგენილია, რომ ქალები, რომლებიც მუშაობენ, გაცილებით თავდაჯერებულები, მიზანდასახულები და მოვლილები არიან, ვიდრე ქალბატონები, რომლებიც არ მუშაობენ. როცა იცით, რომ თქვენზე მნიშვნელოვანი საკითხებია დამოკიდებული, სულ ფორმაში ხართ და საკუთარ თავს მოდუნების საშუალებას არ აძლევთ.
არასოდეს დაივიწყოთ, რომ ქალი ხართ. დღის განმავლობაში საკუთარ თავს თხუთმეტი წუთი მაინც დაუთმეთ. ეს ნამდვილად არ არის ბევრი და ნუ იწუწუნებთ, რომ ყველაფერს ვერ ასწრებთ. სულერთია, მაინც არავის შეეცოდებით. ხშირად ჰკითხეთ საკუთარ თავს: „რა მინდა მე?“, „რა მაკლია იმისთვის, რომ ბედნიერი ვიყო“? და... ისწავლეთ, შეაქოთ საკუთარი თავი, ნებისმიერი, თუნდაც პატარა წარმატებისთვის. აუცილებელია, იაზროვნოთ და განსაჯოთ ობიექტურად. დაინახოთ რეალობა ისეთი, როგორიც სინამდვილეშია.
თუ ყველაფერს გაითვალისწინებთ, რაზეც ვილაპარაკეთ, დასახული მიზნისკენ უფრო ადვილად და სწრაფად წაიწევთ. მიზანდასახული და ორგანიზებული ქალისთვის შეუძლებელი არაფერია.