პრობლემა პრობლემის გარეშე
ნიჭია ის, როცა არ ხედავ პრობლემას იქ, სადაც ის რეალურად არ არსებობს. ბედნიერება გაცილებით ადვილად მისაღწევია, როცა არ ხედავ ხელოვნურ ბარიერებს, ანუ, იმ წვრილმან წინააღმდეგობებს, რომელთა დაძლევა ძალიან მარტივად შეიძლება, თუკი მათ არ მისცემთ საშუალებას, ცხოვრება გაგიფუჭონ. მაგალითად, ასაკი. ახლავე უკეთ განგიმარტავთ, რას ვგულისხმობთ ასაკში: როცა წყვილს შორის ერთ-ერთი მინიმუმ შვიდი-რვა წლით არის უფროსი, საზოგადოებისთვის შედარებით მისაღებია, ოღონდ იმ შემთხვევაში, თუ უფროსი მამაკაცია. მაგრამ პროგნოზი ვერანაირად ვერ იქნება ერთგვაროვანი, რადგან ურთიერთობა მაინც იმ ორის ასაგები და გადასაწყვეტია, ვინც იწყებს ამ ურთიერთობას.
ფსიქოლოგებს მიაჩნიათ, რომ ოჯახი ჰარმონიულია მაშინ, როცა ცოლ-ქმარს შორის ასაკობრივი სხვაობა 5-6 წელია, მაგრამ იქვე დასძენენ, რომ ეს არ უნდა მივიღოთ, როგორც კანონზომიერება. ბოლო დროს შეიმჩნევა საკმაოდ ნოვატორული ცვლილება სწორედ ასაკობრივ ბალანსებთან დაკავშირებით. ახალგაზრდა მამაკაცები საკმაოდ სტაბილურ და ჰარმონიულ ოჯახებს ქმნიან თავისზე ათი-თორმეტი წლით უფროს ქალებთან. ამერიკაში ასეთი ქორწინებების რიცხვმა უკვე 13 პროცენტს გადააჭარბა, ევროპაში კი ეს მაჩვენებელი კიდევ უფრო მაღალია. სოციოლოგებს ამაზე ერთგვაროვანი პასუხი აქვთ: მამაკაცებს მოსწონთ სერიოზული, ჩამოყალიბებული პარტნიორის მზრუნველი ფრთის ქვეშ ყოფნა. სხვათა შორის, ნორჩი გოგონებიც ზუსტად ამ მიზეზით ირჩევენ ცხოვრების თანამგზავრებად ასაკით თავისზე ბევრად უფროს მამაკაცებს. ისინი კომფორტულად და მშვიდად ცხოვრობენ ასეთი ქმრების გვერდით. იმის თქმა, რომ ამ ტიპის ქორწინებებს საფუძვლად მხოლოდ ანგარება უდევს, რა თქმა უნდა, შეცდომაა. რომ არ არსებობდეს ინტერესთა თანხვედრა, სულიერი და ფიზიკური სიახლოვე, მხოლოდ ანგარებაზე დაფუძნებული ქორწინება დიდხანს ვერ გასტანს. ამიტომ, თუკი თქვენი რჩეული, ანუ ადამიანი, რომლისკენაც გული მიგიწევთ, ასაკით თქვენზე ბევრად უფროსი, ან, პირიქით – უმცროსია, ამისგან პრობლემას ნუ შექმნით, მთავარია, მოგწონდეთ და გინდოდეთ ერთმანეთი. გარდა ამისა, უზარმაზარ როლს ასრულებს გემოვნება და ცხოვრების სტილი, სამეგობრო და ის სტერეოტიპები, რომლებიც, როგორც ერთი, ისე მეორე მეუღლისთვის არის მისაღები და ახლობელი.
იმოქმედეთ გულისა და სულის კარნახით. ჩარჩოებიდან გამოდით და... იცხოვრეთ პრობლემების გარეშე!..