არის თუ არა სიზმარი რეალობის ანარეკლი და რომელი სტიქიის ქვეშ დაბადებული ადამიანები ხედავენ ხშირად წინასწარმეტყველურ სიზმრებს
ბევრი ღამით ნანახ სიზმარს დიდ ყურადღებას აქცევს, ბევრიც იგნორირებას უკეთებს და მიაჩნია, რომ სიზმარი რეალობასთან არანაირ კავშირში არ არის და მას ყურადღება არ უნდა მიექცეს.
არადა, თითოეულმა ჩვენგანმა კარგად უნდა დაიმახსოვროს ღამით ნანახი სიზმარი, დილით გონებაში გააანალიზოს, და დაფიქრდეს, ხომ არ არის ეს მინიშნება რაიმეზე და რეალურ ცხოვრებაში გაითვალისწინოს ღამით მიღებული საჭირო ინფორმაცია.
გეტყვით, რომ სიზმარი ჩვენი ყოველდღიური თანამგზავრია და ის სინამდვილის, რეალური ცხოვრების ზუსტი ანარეკლია. ამიტომ, გირჩევთ, ნუ ეცდებით სიზმრის აბსურდულობის დამტკიცებას რეალობაში. ყოველ დილით აღიდგინეთ ღამით ნანახი, გააანალიზეთ, დაუკავშირეთ რეალურ ფაქტებს და გაითვალისწინეთ დღის განმავლობაში. შესაძლოა, სიზმარმა საბედისწერო შეცდომის შესახებ ან თუნდაც, საფრთხეზე მოგცეთ მინიშნება.
ზოგიერთი ზოდიაქოს ნიშნის ქვეშ დაბადებული ადამიანები სიზმრების მიმართ მეტად მგრძნობიარენი არიან. ხშირადაც ხედავენ სიზმრებს და უხდებათ კიდეც ისინი რეალურ ცხოვრებაში. მაგალითად, ყველაზე ხშირად მინიშნებებს ღამით იღებენ – „კირჩხიბის”, „თევზების”, „მერწყულის” და „კუროს” ზოდიაქოს ნიშნით დაბადებული ადამიანები.
სიზმარი, რომლის ახდენის დიდი შანსია, ადამიანებს მეტწილად სავსე მთვარის პერიოდში ესიზმრებათ. განსაკუთრებით კი მაშინ, როცა მთვარე „თევზების” და „კუროს” ზოდიაქოს ნიშანს გადის.
ასევე, მალევე ცხადდება რეალობაში ის სიზმრებიც, რომელთაც ახალმთვარეობიდან პირველ, მესამე, მერვე, მეცხრე, მეთერთმეტე, მეთორმეტე, მეთექვსმეტე, მეჩვიდმეტე, მეთვრამეტე, მეცხრამეტე, ოცდამეორე, ოცდამეხუთე, ოცდამეექვსე, ოცდამეშვიდე, ოცდამერვე, ოცდამეცხრე და ოცდამეათე დღეს ვნახულობთ. ამ დღეებში ნანახ სიზმარს მეტი ყურადღებით უნდა მოეკიდოთ და უნდა გაითავისოთ ის მინიშნება თუ ინფორმაცია, რასაც ძილში გაწვდიან ზებუნებრივი ძალები.
წყლის სტიქიის ნიშნები, კერძოდ, კირჩხიბები, მორიელები და თევზები, ყველაზე ხშირად ხედავენ სიზმრებს და სწორედ ღამეული ხილვების მიხედვით იგებენ მომავალს – სიზმრის სახით იღებენ თავისთვის მეტად საჭირო ინფორმაციას და მინიშნებას. ეს კი ხშირად, მათი წარმატების მიზეზია რეალურ ცხოვრებაში.
ჰაერის სტიქიის ნიშნები, კერძოდ, ტყუპები, სასწორები და მერწყულები ღამით ისეთ სიზმრებს ხედავენ, რაზეც დღისით, ანუ რეალურ ცხოვრებაში ფიქრობენ და განიცდიან. შესაძლოა, ამ ნიშნის ქვეშ დაბადებულმა ადამიანებმა სიზმარში სწორედ იმ პრობლემის გადაჭრის გზები მოიძიონ, რომლის მოგვარებასაც ვერ ახერხებენ რეალურ ცხოვრებაში. ინფორმაცია, რასაც სიზმარი მათთვის ღამით აგზავნის კოსმოსიდან, ჰაერის სტიქიის ნიშნებისთვის, ძირითადად გადაუჭრელ პრობლემებს და მათი მოგვარების გზებს უკავშირდება.
ცეცხლის სტიქიის ქვეშ დაბადებულ ადამიანებთან, ანუ ვერძებთან, ლომებთან და მშვილდოსნებთან სიზმარი ფერადი სახით მოდის. მათ ვურჩევ გაითვალისწინონ ყოველი ის გაფრთხილება, რასაც ღამით კოსმოსი ახალმთვარეობის დღეებში უგზავნის. ნუ გაუკეთებთ იგნორირებას ღამის ხილვებს, რათა ზედმეტი პრობლემა არ შეიქმნათ რეალურ ცხოვრებაში – სიზმრით მიღებული ინფორმაცია დაგეხმარებათ ზედმეტი ხლაფორთის გარეშე მარტივად დაიპყროთ მწვერვალები და დაიკმაყოფილოთ საკუთარი ამბიციები.
მიწის სტიქიის ნიშნები – კუროები, ქალწულები და თხის რქები სიზმრად იმას ხედავენ, თუ როგორ გადაჭრან პრაქტიკულად პრობლემა რეალურ ცხოვრებაში. ასევე, მათ ხშირად ესიზმრებათ წინასწარმეტყველური სიზმრები. თუ ამ სიზმრებს მეტი ყურადღებით მოეკიდებიან მიწის სტიქიის ნიშნები, მაშინ ისინი ცხოვრებაში ადვილად მიაღწევენ წარმატებებს და იღბალიც ადვილად გაუღიმებთ.