აკერმანი ყველაზე მაღალანაზღაურებადი გერმანელი ხელმძღვანელია
გერმანული „დოიჩე ბანკის“ ხელმძღვანელმა იოზეფ აკერმანმა კვლავაც ყველაზე მეტი გამოიმუშავა გერმანული კონცერნების მეთაურთა შორის. ეს იმის წყალობით მოხდა, რომ 2009 წლის განმავლობაში „დოიჩე ბანკის“ შემოსავალმა 4,97 მილიარდი ევრო შეადგინა. საინტერესოა, რომ ახალი საბანკო წესების თანახმად, აკერმანი თავის ანაზღაურებას არა ერთბაშად, არამედ ნაწილ-ნაწილ და თანაც თავის თანამდებობაზე საქმიანობის წარმატებით გაგრძელების შემთხვევაში მიიღებს. საკუთარი ტოპ-მენეჯერების ანაზღაურების მხრივ „დოიჩე ბანკი“ კრიზისამდელ მაჩვენებლებს აღწევს. 2009 წლის განმავლობაში საქმიანობისთვის ამ გერმანული ბანკის მმართველობის 8 წევრმა, ჯამში 39 მილიონი ევრო მიიღო. ამ სიას იოზეფ აკერმანი 9,55 მილიონით უდგას სათავეში, მაგრამ, როგორც აღვნიშნეთ, ამ თანხის 70 პროცენტს ის უახლოესი რამდენიმე წლის განმავლობაში, კონცერნის წარმატების საქმიანობის შემთხვევაში, მიიღებს. აღსანიშნავია ისიც, რომ 2008 წლის შედეგების მიხედვით, აკერმანმა ნებისმიერი პრემიის მიღებაზე უარი თქვა და მხოლოდ საკუთარი ფიქსირებული ანაზღაურება – 1,39 მილიონი ევრო მიიღო.