რატომ ხდება ავარია გასწრების დროს და როგორ ავიცილოთ ის თავიდან
ამ ბოლო დროს დედაქალაქში განსაკუთრებით მოხშირდა ავარიების რიცხვი, რაც გარკვეულწილად მომატებული ნალექის ბრალია. მევლუდ მელაძე ამ ინტერვიუში აგვიხსნის ავარიის თავიდან აცილების რამდენიმე მარტივ ხერხს, რომელიც, ალბათ, ნებისმიერ მძღოლს ძალიან გამოადგება, მიუხედავად იმისა, არის თუ არა ის სწრაფი სიარულის მოყვარული.
მევლუდ მელაძე: საგზაო შემთხვევები წარმოუდგენლად მოხშირდა. ამიტომ, კარგი იქნება, თუ კიდევ ერთხელ გავიხსენებთ იმ ელემენტარულ ქცევებს, რომლებიც მსგავს შემთხვევას თავიდან აგვაცილებდა. წესით, ეს ხერხები მართვის მოწმობის მისაღებ გამოცდებზე უნდა ისწავლებოდეს. ძალიან ბევრი ნიუანსია, რაც უნდა გავითვალისწინოთ და, საერთოდ, თუ საჭესთან „მეწვრილმანეები“ იქნებით და ბევრ დეტალს მიაქცევთ ყურადღებას, ავარიას ნამდვილად აიცილებთ თავიდან. განვიხილოთ ყველაზე ხშირი შემთხვევები, რომლებსაც ძირითადად მსხვერპლი მოჰყვება ხოლმე. პირველ ყოვლისა, ვისაუბროთ მაღალ სიჩქარეზე, მით უმეტეს, ტრასაზე ყოფნის დროს ავარიების 80 პროცენტი მაშინ ხდება, როდესაც სწრაფად მომავალი ავტომობილი გასწრებას ახორციელებს, იმის იმედად, რომ საპირისპირო მხრიდან მომავალი ავტომობილი გაიწევა და გზას დაუთმობს, ანუ – გაეტევა. რეალურად, როგორი ვიწროც არ უნდა იყოს გზა, მით უმეტეს ტრასაზე, იქ სამი ავტომობილის ადგილი მაინც სულ არის. უბედური შემთხვევა კი მხოლოდ ურთიერთგაგების არარსებობის გამო ხდება. თუ ჩვენ მივდივართ გზაზე, ჩვენ წინ და ჩვენს უკან კი არავინ მიდის, ეს კიდევ არ გვაძლევს იმის უფლებას, რომ მოვდუნდეთ, ბუნების თვალიერებით გავერთოთ და სულ არ ვიფიქროთ, რა ხდება საპირისპირო მხარეს. თუ ჩვენს პირისპირ მომავალი ავტომობილი მოდის ნელა, ხოლო მის უკან მომავალი ავტომობილი – გაცილებით ჩქარა, ეს ნიშნავს, რომ დაახლოებით იმ წერტილში, სადაც მოგვიახლოვდებიან, გასწრებას განახორციელებს. ამის ყურადღების არმიქცევა დანაშაულია. თუ ჩვენ ეს ვერ გავთვალეთ და სათანადო ზომები არ მივიღეთ, შესაძლოა მოხდეს პირისპირ შეჯახება, რაც საშინელ შედეგს გამოიწვევს. ანუ, ამ შემთხვევაში თქვენ აბსოლუტურად მართლები იქნებით, რადგან თქვენს გზაზე მოდიოდით, მაგრამ ამ სიმართლეს უკვე აღარანაირი მნიშვნელობა არ ექნება. ამით იმის თქმა მინდა, რომ, თუ თქვენ მშვიდად, თქვენს მხარეს, ერთ ზოლში მიდიხართ, არავის არაფერს უშავებთ, არც მაღალი სიჩქარე გაქვთ და, ღვედიც, რა თქმა უნდა, შეკრულია, ეს არ გაძლევთ მოდუნებისა და დამშვიდების საბაბს. საჭესთან ჯდომის მთელი სირთულე ისაა, რომ არასდროს მოდუნდეთ და არც ერთი წამით არ დაივიწყოთ გზის ყველა მხარის კონტროლი. ამიტომ, როდესაც ასეთ შემთხვევას ხედავთ, თავიდანვე ოდნავ გადაიწიეთ გზის მარჯვენა მხარეს და ოდნავ შეანელეთ მოძრაობა, რომ სწრაფად მომავალმა ავტომობილმა ორ ავტომობილს შორის გავლა მოახერხოს. ნუ იფიქრებთ, რომ ის დაამუხრუჭებს, რადგან გასავლელი ადგილი არ აქვს, თავად დააზღვიეთ მისი მოქმედება. აქვე, მინდა, რჩევა მივცე იმ ავტომობილის მძღოლებსაც, რომლებიც სწრაფად დადიან, მათ შორის – ტრასაზეც და ხშირად ახორციელებენ გასწრებას. თუ ასეთ შემთხვევებში არ აპირებენ დამუხრუჭებას და მაინც ცდილობენ, გაიარონ იმ მონაკვეთში, სადაც გავლა შეზღუდულია, თავიდანვე შეაშინონ საპირისპირო მხრიდან მომავალი ავტომობილი, აუციმციმეთ შორს მაშუქი ფარები, მოუმატეთ სიჩქარეს, დაუსიგნალეთ, კიდევ ოდნავ მარცხნივ გადაიწიეთ, ანუ, ცოტა შეაშინეთ, რომ მიხვდეს, დამუხრუჭებას არ აპირებთ და სანამ მის პირდაპირ აღმოჩნდებით, ის გვერდზე გაიწევა. ანუ, ძალიან მარტივი ხერხით, ოდნავი დაფიქრებით შეიძლება, თავიდან ავიცილოთ შემთხვევა, რომელიც ყველაზე ხშირად იწვევს ავარიებს.
– რაც შეეხება მოცურებას?
– მოცურების კონტროლი ძალიან რთულია, ამიტომ, აგიხსნით, რა შემთხვევებში ხდება ძირითადად მოცურება და როგორ ავიცილოთ ის თავიდან, იქნება ეს წინა თუ უკანა წამყვანი თვლებით აღჭურვილი ავტომობილი. მოცურება განსაკუთრებით საშიშია მოსველებული ასფალტის დროს, როდესაც საფარი ყინულივით ხდება. ჩვენი ქუჩების ძირითად მონაკვეთებს კი გვერდზე მიუყვება ჭადრების ხეივნები. ხესთან შეჯახება კი ყველაზე მძიმე ავარიებს იწვევს. ხე კედელზე, ბოძზე უარესია, რომელიც ორმოცტონიანი სიმძიმის დატრყმასაც კი უძლებს, მაშინ, როდესაც მსუბუქი ავტომობილის შეჯახებისგან ბოძი იღუნება და, ხშირ შემთხვევაში, ეს შეჯახება, თუ ღვედი შეკრულია, სასიკვდილო არ არის. ხე კი სოლივით ერჭობა მანქანას, მისი დანაწევრებაც შეუძლია და მაღალი სიჩქარის შემთხვევაში, ფურცელივითაც კი შეიძლება შემოეხვიოს. თუ გზის საფარი მოსველდა, უნდა გვახსოვდეს, რომელი საბურავებით ხართ. თუ თქვენი მანქანა „დგას“ ხუთ წელზე მეტი ხნის საბურავზე, როგორი კარგი პროტექტორიც უნდა ჰქონდეს, მოდება ნული ექნება. თუ ავტომობილი სხვადასხვა ტიპის საბურავზე „დგას” ეს კიდევ უფრო აუარესებს სიტუაციას, რადგან ისინი სხვადასხვაგვარად ეჭიდებიან გზის საფარს და, თუ ერთი კარგად მოეჭიდა, მეორე კი – ნაკლებად, ოდნავ მაღალი სიჩქარის დროს მისი მოცურება გარდაუვალი იქნება. უკანა წამყვანის შემთხვევაში მოცურება ხდება მაშინ, როდესაც სიჩქარეს ვცვლით და მოდებას მკვეთრად გავუშვებთ, ეს სიმკვეთრე სველი გზის საფარზე ხელის მუხრუჭივით რეაგირებს და ავტომობილი ცურავს. რაც შეეხება წინა წამყვანს, მისი უმართაობა მოსახვევში იწყება. თუ შევდივართ მოსახვევში და ის არ უხვევს, ჩვენ ვატრიალებთ და ვატრიალებთ საჭეს და ვუმატებთ „გაზს“, ეს არასწორია. ვუხვევთ იმდენს, რამდენიც კონკრეტულ მოსახვევში გვჭირდება და ველოდებით, როდის იპოვის საბურავი მოდებას. რაც უნდა ვუმატოთ „გაზს“, ეს მხოლოდ და მხოლოდ კარგად მოგვაცურებს და სხვას არაფერს იზამს.