აბრამოვიჩი აბობოქრდა
ლონდონის „ჩელსის“ მფლობელი რომან აბრამოვიჩი გაცოფებულია – ჩემპიონთა ლიგიდან მისი გუნდის გამოვარდნამ რუს ოლიგარქზე ძალიან ცუდად იმოქმედა. ჰოდა, „არისტოკრატთა“ ვარჯიშის დროს, ყველასთვის მოულოდნელად, ერთ-ერთ მინდორზე აბრამოვიჩის ვერტმფრენი დაეშვა, საიდანაც კლუბის მფლობელი და დირექტორთა საბჭოს წევრები გადმოვიდნენ. ვარჯიში შეწყდა და საგანგებო კრება დაინიშნა, რომელსაც დირექტორებიდან დაწყებული, ბაზის რიგითი თანამშრომლით დასრულებული, ყველა დაესწრო.
„ეს არ იყო დებატები და აზრთა გაცვლა-გამოცვლა. ეს გახლდათ აბრამოვიჩის ორსაათიანი მონოლოგი. იგი არ საუბრობდა, იგი ყვიროდა და ბოლოს განაცხადა – თუ წელს ჩემპიონები ვერ გახდებით, გუნდიდან წავა ყველა, ფეხბურთელებიდან დაწყებული, სამედიცინო პერსონალით დამთავრებული. ყველა, ვისაც კი დღეს „ჩელსისთან“ რაიმე შეხება აქვს და ხელფასს იღებს. ახლა თქვენ იცით, როგორ უნდა მოიქცეთ“, – ასე დაასრულა აბრამოვიჩმა სიტყვა და ბაზა დატოვა.
შეგახსენებთ, რომ დღემდე რუს ოლიგარქს „ჩელსის“ განვითარებისთვის ნახევარ მილიარდ ფუნტზე მეტი აქვს დახარჯული.