აბრამოვიჩის მეგობარი ქალბატონი ჰოლივუდელია
რუსი ოლიგარქის, ალექსანდრ ჟუკოვის ქალიშვილმა და მსოფლიოში ცნობილი მილიარდერის, რომან აბრამოვიჩის მეგობარმა ქალბატონმა – დარია ჟუკოვამ ლოს-ანჯელესში, ჰოლივუდის გორაკებზე, სახლი 19,5 მილიონ დოლარად იყიდა. ტოსკანურ სტილში აგებული ნაგებობის საერთო ფართობი 9 700 კვადრატული მეტრია. მასში 6 საძინებელი ოთახი, 8 აბაზანა, აუზი, საბილიარდო, კინოდარბაზი და მარანია განთავსებული. როგორც ცნობილია, რამდენიმე თვის წინ დარია ჟუკოვას აბრამოვიჩისგან ვაჟი – აარონ ალექსანდრი შეეძინა. რუსი მილიარდერის მეგობარმა ქალბატონმა სწორედ ლოს-ანჯელესში მდებარე ერთ-ერთ სამედიცინო კლინიკაში იმშობიარა. ერთ-ერთმა წყარომ, წყვილის გარემოცვიდან, განაცხადა, რომ დარია ჟუკოვა დიდი ხნის განმავლობაში ცხოვრობდა ლოს-ანჯელესში და ამიტომაც იმშობიარა ამ ქალაქში. როგორც ჩანს, ჟუკოვამ გადაწყვიტა, უფრო მეტად დაკავშირებოდა „ანგელოზების ქალაქს“ და იქ გამორჩეული საცხოვრებელი სახლი შეიძინა. მიუხედავად ლოს-ანჯელესისადმი განსაკუთრებული დამოკიდებულებისა, რომან აბრამოვიჩმა და დარია ჟუკოვამ ვაჟის დაბადება და ახალი წელი აღნიშნეს არა ამ ქალაქში, არამედ რუსი მილიარდერის მიერ არცთუ ისე დიდი ხნის წინათ მილიარდერთა კუნძულ სენტ-ბარტელმიზე 89 მილიონ დოლარად შეძენილ სასახლეში, რომელიც მანამდე როკფელერების ცნობილი დინასტიის შთამომავალს, დევიდ როკფელერს ეკუთვნოდა. ეს სასახლე მეექვსეა იმ სახლებს შორის, რომელიც 43 წლის ოლიგარქმა რუსეთის ფარგლებს გარეთ შეიძინა.