ქეთი ყრუაშვილი: მე და რატი თანამშრომლები ვიყავით. ერთმანეთი სამსახურში გავიცანით. სოფლის მეურნეობის პროექტების მართვის სააგენტოში ვმუშაობდით ერთად. სამი წლის წინ ორივემ სტაჟირებით დავიწყეთ. თავიდან ძალიან დიდი ხნის განმავლობაში ვმეგობრობდით და მერე ეს ურთიერთობა სხვა გრძნობაში გადაიზარდა. შეიძლება, თავიდანვე იყო რაღაც, სხვა შემთხვევაში, ასე ახლო მეგობრები არ ვიქნებოდით. პირველად რატი გამომიტყდა სიყვარულში. ორ წელიწადზე მეტხანს ვიყავით შეყვარებულები.

– ყველა ამპლუაში გამოვცადეთ ერთმანეთი და გადავწყვიტეთ, უფრო სერიოზული ნაბიჯი გადაგვედგა და მთელი ცხოვრება ერთად გაგვეტარებინა. ვიცოდით, რომ ჩვენი ურთიერთობის საბოლოო მიზანი ოჯახის შექმნა იქნებოდა, მაგრამ ხელის თხოვნა ცოტა მოულოდნელი იყო. პანდემიიდან გამომდინარე, ასე მალე არ ველოდი ამას. ყველაფერს უფრო გრანდიოზულად ვგეგმავდით, მაგრამ ახლა რეგულაციების გამო, შეზღუდულები ვიყავით.

– პირველი პაემანი სადაც გვქონდა, იმ ადგილას ძალიან ახლო ადამიანები ვიყავით და მოულოდნელად ხელი მთხოვა (იცინის). ეს ჩვენი ურთიერთობის ლოგიკური განვითარება იყო.

– დაუჯერებლად კარგი ადამიანია. მართლა მჯერა, რომ ობიექტური ვარ მის შეფასებაში. ძალიან წრფელი და უკარგესი გული აქვს და ჩემთვის ესაა ყველაზე მთავარი. ძალიან კარგად შეუძლია ადამიანის გვერდით დგომა და ალბათ, ამ ყველაფერმა გამოიწვია ჩემი მისდამი სიყვარული.

– ისე გამოვიდა, რომ თავიდანვე ორივემ ვიცოდით ერთმანეთის შესახებ. ერთ ოთახში ვმუშაობდით და სხვანაირად გამორიცხული იყო. ის შეხედულება, რაც თავიდან რატიზე მქონდა, როგორც უმეტესობას, თუნდაც მედიიდან გამომდინარე და იმის გამო, რომ ბევრ რამეში ჩემი რატი ძალიან დამიჩაგრეს, სრულიად შემეცვალა. რა თქმა უნდა, რთულია, როცა ცნობილი ადამიანის შვილი ხარ, მაგრამ ვინც მას პირადად იცნობს, ყველა მეუბნება, ვერც წარმოგვედგინა, თუ ამდენად განსხვავებული ადამიანი იყოო. ჯერ მე დავიწყე მუშაობა და მალევე მოვიდა რატიც. სამსახურში მართლა ყველას უკვირდა, სხვას ელოდნენ და სხვა ადამიანი გაიცნეს.

– არ უყვარს საჯაროდ გამოჩენა, არც – მე. არც სოციალურ ქსელებში ვართ მაინცდამაინც აქტიურები. ძალიან მოკრძალებულად ვცხოვრობთ, ალბათ, ყველას სხვანაირი წარმოდგენა აქვს. საკუთარი თავის განვითარებაზე ძალიან ბევრს ვმუშაობთ და მედიასაშუალებებს თუ სოციალურ ქსელს გავურბივართ. სამსახურში თავიდან მეტოქეებივით მივიჩნევდით ერთმანეთს, რადგან ორივე სტაჟიორი ვიყავით (იცინის). ალბათ, რატი უფრო ყურადღების ცენტრში იყო და ამის გამო მე ცოტა რაღაცნაირი მომენტი მქონდა, რატის – არა (იცინის). ერთადერთ გადაცემაში მიიღო მონაწილეობა და ისიც მერე ვნახე, როცა გავიცანი. რა თქმა უნდა, ვიცოდი, ვინ იყო და ვისი შვილი, მაგრამ რაღაცებს რომ აბრალებდნენ და ასე შემდეგ – არა. რეალურად გავიგე, რომ მართლა ძალიან დიდი განსაცდელები აქვს გამოვლილი. ხალხი, ალბათ, ვერც დაიჯერებს. შეიძლება, ყველას ჰგონია, რომ მისთვის უფრო მარტივია ცხოვრება, არადა – პირიქით. როდესაც ასეთი ძლიერი და ცნობილი დედა გყავს, უფრო რთულია. დროთა განმავლობაში რომ ვიგებდი, რამდენად რთული ცხოვრება ჰქონდა გავლილი და მაინც ასეთი გულის ადამიანად დარჩა, ძალიან დავაფასე. ასეთ დროს შეიძლება, ადამიანი გაბოროტდე, რატი, ამ მხრივ, ყველაზე სუფთა ადამიანია და ჩემი სიყვარულის მთავარი მიზეზი ესაა.

– ისე დაემთხვა, რომ საკმაოდ მალე გავიცანი. თავიდან მქონდა რიდი, შეიძლება, ოდნავ შიშიც. 20 წლის ვიყავი და ასაკმაც იქონია გავლენა. მაგრამ რომ გავიცანი, საერთოდ შემეცვალა შეხედულებები. სულ სხვა ადამიანი აღმოჩნდა. მისი პროფესიიდან გამომდინარე, ძალიან ძლიერი და წარმატებული ადამიანია, შორიდან ბევრი რამ შეიძლება, მარტივი ჩანს, მაგრამ მე მასავით შრომისმოყვარე ადამიანს არ ვიცნობ. სულ ვეუბნები, შრომისმოყვარეობით და გამბედაობით უნდა დაგემსგავსოთ-მეთქი (იცინის).

– თავიდანვე იმდენად თბილად მიმიღო, ცოტა გაკვირვებული ვიყავი, არ ველოდი. დღეს თამამად ვამბობ, მე ხომ საოცრად მიყვარს, მაგრამ მისგანაც ძალიან დიდ სიყვარულს ვგრძნობ. მართლა შვილივით ვყავარ და ეს ჩემთვის ძალიან მნიშვნელოვანია, იმიტომ, რომ ექვსი წლის ვიყავი, როდესაც დედა გარდამეცვალა და ეკასგან დედის სითბოს ვგრძნობ, რაც ძალიან გულისამაჩუყებელია. სამწუხაროდ, ორი წლის წინ მამაც დამეღუპა და ამიტომ, მისი ჩემდამი დამოკიდებულება ჩემთვის ძალიან ბევრს ნიშნავს. ალბათ, ყველამ იცის, რამდენად სამართლიანი ადამიანია და არ მახსოვს მისგან რამე მწყენოდა. გულს არასდროს გატკენს, თან, ძალიან თბილია და ეკრანიდან ვინც იცნობს, ამას ვერც წარმოიდგენს.

– ჯერ ახალი დაწყებულია ეს ყველაფერი და თამამად ვერ ვისაუბრებ ამაზე, მაგრამ ერთ რამეში ორივე დარწმუნებულები ვართ, რომ ამბობენ, მეორე ნახევარი არსებობსო, მგონია, რომ ჩვენ სწორად ვიპოვეთ ერთმანეთი. მთავარია, სიყვარული, ურთიერთგაგება და პატივისცემა, თუ ეს არის, ყოველდღიური წვრილმანები მოგვარებადია.

– ალბათ, ძალიან ხმაურიანი ვარ და ამით (იცინის). თან სულ ვიცინი. რატი ძალიან დაკვირვებული ადამიანია. შეიძლება, ძალიან დიდი ხანი ჩუმად იყოს და გგონია, რომ ყურადღებას არ გაქცევს, თავის ფიქრებშია, მერე კი ხვდები, რომ თურმე, ყველა დეტალს აკვირდებოდა. ურთიერთობა რომ დავიწყეთ, აღმოვაჩინე, რომ ყველა ჩემი სიტყვა და ქმედება ახსოვდა (იცინის).