ზურგის ტკივილი მეტად გავრცელებული პრობლემაა, საკმაოდ შემაწუხებელია და ადამიანს დიდად უშლის ხელს აქტიურ ცხოვრებაში.

ზურგის ტკივილის გამომწვევი მიზეზები შეიძლება, იყოს:

* ჩონჩხ-კუნთოვანი ცვლილებები (დაჭიმვა, კუნთების ან ხერხემლის სახსრების ტრავმები);

* ხანგრძლივი სტატიკური დატვირთვა (მაგალითად, „მჯდომარე“ სამსახური, ფიზიკური აქტივობის ნაკლებობა);

* ჭარბი წონა;

* მონოტონური ფიზიკური სამუშაო;

* ხერხემლის მეტასტატიკური სიმსივნეები;

 * მრავალფეროვანი ანთებითი და ინფექციური დაავადებები;

 * ხერხემლის სახსრების თანდაყოლილი ან შეძენილი პათოლოგია;

* რადიკულიტი (რადიკულოპათია);

* დეპრესია, მუდმივი სტრესი.

ზურგის ტკივილების თავიდან ასაცილებლად უნდა გაითვალისწინოთ:

* თუ თქვენ „მჯდომარე“ სამსახური გაქვთ, აუცილებლად წამოდექით და იმოძრავეთ ყოველ 45-60 წუთში ერთხელ. ასევე მნიშვნელოვანია, სწორად იჯდეთ. ზურგი სწორად დაიჭირეთ, მიეყრდენით სკამის ზურგს, მიიღეთ კომფორტული პოზა, გაშალეთ მხრები. ფეხები იატაკს უნდა ეხებოდეს.

* დაიცავით ოპტიმალურად მოძრავი რეჟიმი და დაიწყეთ დილა ვარჯიშით, რაც შეიძლება მეტი ისეირნეთ ფეხით. მაშინაც კი, როდესაც სამსახურამდე მანქანით მიემგზავრებით, გამონახეთ ცოტა დრო ფეხით გასეირნებისთვის. თუ თქვენს მობილურ ტელეფონში ვერ ატვირთავთ შესაბამის აპლიკაციას, შეიძინეთ ნაბიჯების გამზომი და დაითვალეთ, რამდენ ნაბიჯს აკეთებთ დღეში, საჭიროა არანაკლებ 10 000;

* გააკონტროლეთ საკუთარი წონა, ის არ უნდა იყოს ზედმეტი ან არასაკმარისი;

* ნუ ასწევთ სიმძიმეებს, 5-6 კილოგრამზე მეტს – თუ ქალბატონი ბრძანდებით, 8 კილოგრამზე მეტს – თუ მამაკაცი ხართ. თუ მაინც გიწევთ სიმძიმეების აწევა, თანაბრად გადაანაწილეთ დატვირთვა ორივე ხელზე;

* გახსოვდეთ, რომ ტკივილმა შესაძლოა, სრულიად მოულოდნელად და აბსოლუტურად ნებისმიერ ადგილას იჩინოს თავი. ძალიან მნიშვნელოვანია, რომ თქვენ ყოველთვის ატაროთ თან ტკივილგამაყუჩებელი და ანთების საწინააღმდეგო პრეპარატი;

* სიფრთხილით მიუდექით სპორტის ყველაზე ტრავმულ სახეობებს. აჯობებს თუ ცურვას აირჩევთ – ეს არა მხოლოდ ზურგისა და სახსრებისთვისაა სასარგებლო, არამედ საუკეთესო აქტივობაა, რომელიც დაგეხმარებათ დაისვენოთ და განწყობა აიმაღლოთ;

* თუ დიდი ხნის განმავლობაში დგომა/ჯდომა გიწევთ, შეეცადეთ, შეცვალოთ პოზა ყოველ 15 წუთში. თუ დგახართ, რამეს დაეყრდენით, მაგალითად, კედელს;

* არ ინერვიულოთ. შეეცადეთ, შეინარჩუნოთ ხელსაყრელი ფსიქოლოგიური მიკროკლიმატი სახლსა და სამსახურში – მშვიდად მიუდექით პრობლემებს, ნუ დაიღლით თავს უარყოფითი აზრებით, უბრალოდ, იპოვეთ გამოსავალი შექმნილი სიტუაციიდან;

* არ დაიძინოთ ძალიან მაგარ ან ძალიან რბილ საწოლზე. ყველაფერს აჯობებს, თუ სპეციალურ ორთოპედიულ ლეიბს შეიძენთ;

* თუკი ზურგის ტკივილი რეგულარულად გაწუხებთ, მაშინაც კი, თუ ტკივილი საკმაოდ ასატანია – მიმართეთ სპეციალისტს.