ჩვენებური საგარეო საქმეთა სამინისტრო ჯერჯერობით დუმს, მაგრამ დე-ფაქტო აფხაზეთის, ეგრეთ წოდებული, სპორტისა და ახალგაზრდობის სახელმწიფო კომიტეტის თავკაცი ჯემალ გუბაზი (თავის დროზე „დინამო“ თბილისის ფეხბურთელი) მადლობას უხდის სომხეთის ეროვნული კომიტეტის ვიცე-პრეზიდენტს რუბენ ტატულიანს იმ დახმარებისთვის, რაც მან აფხაზეთში ფეხბურთის ჩემპიონატის ჩასატარებლად გასწია (ჩემპიონატი წელიწად-ნახევრის წინათ შეჩერდა და 2019 წელს არ ჩატარებულა, როგორც ამბობენ უსახსრობის გამო).

  სხვა საქმეა, რა დროს ჩემპიონატია (იმას გარდა, რომ აფხაზმა ფეხბურთელებმა ერთბაშად მსოფლიო არ დატოვონ სახტად თავიანთი საფეხბურთო ტექნიკით?!) და თუ ფორმების ფული არ გაქვს, ან რა გეფეხბურთება, ან რა გედამოუკიდებლება, მაგრამ აქ სხვა „მაგრამაა“ – რატომ აძლევს თავის თავს უფლებას მეზობელი სომხეთის ოფიციალური პირი, ითანამშრომლოს სეპარატისტულ აფხაზეთთან და უფრო მთავარი „მაგრამ“ ისაა, თუ რატომ დუმან გულჩვილი ჩვენი ის თანამემამულეები, რომლებმაც თვალცრემლიანებმა შეადგინეს პეტიცია და საქართველოს მთავრობას კატეგორიულად სთხოვდნენ, დახმარებოდნენ სომხეთს კორონავირუსთან ბრძოლაში.

  წერა დაავიწყდათ თუ საკუთარი სახელმწიფოს ინტერესების დაცვა ეზედმეტებათ?!