ისეთი ამბები ხდება ამ სამგანზომილებიან სამყაროში, რომ ნავთობის ფასი 30 დოლარამდე ჩამოქვეითდა, საფონდო ბირჟები ერთიმეორის მიყოლებით იხურება, მდიდრები კოტრდებიან, ერთი ისაა, მეწამლეები (ანუ ფარმაცევტული კომპანიები) მდიდრდებიან და ოქრო ძვირდება (ღირს დაფიქრებად – ვის აქვს მსოფლიოში ოქროს ყველაზე დიდი მარაგები!).

  სპეციალისტები გვანათლებენ, რომ ყველაფერში დამნაშავე კორონაა, თუმცა, მე რომ მკითხოთ, აქ ადამიანის ხელიც ურევია (რადგან საფონდო ბირჟაც ადამიანის შექმნილია და მსოფლიოში არსებული წესებით, თუ მთლად კორომავირუსიც არა).

  მაგრამ მთავარი ეს მაინც არ არის: ბენზინი მთელ დედამიწაზე გაიაფდა (ან კი როგორ არ გაიაფდებოდა, როდესაც ნავთობი ვედრო ლამის 2 შაურადაა დაყრილი?!), საქართველოში თითქმის ძველ ნიშნულზეა – აი, ფასებს ცეცხლი რომ ეკიდა.

  კარგა ხნის დადასტურებული ფაქტია, რომ ჩვენებური მენავთობეები სინდისთან მწყრალად არიან, მაგრამ არც იმას გამოვრიცხავ, რომ უბრალოდ, კორონავირუსის ეკონომიკაზე მავნე ზემოქმედებას არ აღიარებენ და, რაკი არ იმჩნევენ ნავთობზე ფასის კატასტროფულად ვარდნას, ამით საშიშ ვირუსს უგულებელყოფენ – იმიტომ რომ მსგავსი ნამუსგარეცხილობა, ფაქტობრივად, წარმოუდგენელია.