თუმცა რუსთაველმა ჯერ კიდევ რვა საუკუნის წინათ შეგვაგონა, სხვა სხვისა ომში ბრძენიაო, ჩვენ მაინც არ ვიშლით და გეოპოლიტიკის იმდენი ექსპერტი გამომზეურდა, ლამისაა მსოფლიო ლოდერებმა თქვან, სახლებში უნდა წავიდეთ და ამ თვითნაბადი ნიჭით დაჯილდოებულებს უნდა გადავცეთ მსოფლიოს მართვის სადავეებიო.

  მანამდე კი მოვლენები მეტად საინტერესოდ ვითარდება: აშშ-ირანის სამხედრო დაპირისპირება, ძირითადად, სხვა ქვეყნის ტერიტორიაზეა. ერთმანეთის მისამართით მკაცრ განცხადებებს ავრცელებენ, სროლით კი ერთმანეთს ერაყში ესვრიან. მეტიც, ირანელებმა განაცხადეს, „თუ, თუნდაც, ერთი ამერიკული რაკეტა ჩამოვარდება ირანის ტერიტორიაზე, ჩვენ დამანგრეველ სარაკეტო იერიშს მივიტანთ დუბაის, ჰაიფასა და თელ ავივზე“. ანუ თქვენს მოკავშირეებს დავნაყავთო (ეს სცენარიც ნაცნობია ჩვენთვის, აშშ-ს რომ ვერ მისწვდა, იმიტომაც ამოგვნაყა რფ-მ, ანუ ვისაც მოერია, ის სცემა).

  აქედან გამომდინარე კი, აშკარაა, ზემონახსენებ ჩვენებურ „ნათელი გონის“ „ექსპერტებს“ ის ურჩევნიათ, იმაზე იფიქრონ, ვინმეს რაკეტა თავში არ მოგვხვდეს მათი მონდომებული „ექსპერტული“ შეფასებების გამო.