№1 ექიმის რჩევები
კითხვა: ვარ 20 წლის და ხშირად მერევა სიტყვები. სხვა სიტყვას ვგულისხმობ და სულ სხვას ვამბობ. რისი ბრალი შეიძლება იყოს?პასუხი: მეტყველების მსგავსი დარღვევის დროს პირველადი შეფასებისთვის აუცილებელია ნევროლოგთან ვიზიტია, რათა ადეკვატურად შეფასდეს მდგომარეობა და გაირკვეს დარღვევის რეალური მიზეზი. ასეთი დარღვევა შესაძლოა, მეტყველების ტემპის აჩქარებითაც (სწრაფი მეტყველება) იყოს გამოწვეული.
კითხვა: მაინტერესებს, ყოველდღე შვრიის ფაფის დილაობით მიღება სასარგებლოა თუ საზიანო?
პასუხი: შვრია შეიცავს ფიტინის მჟავას, რომელიც აბრკოლებს კუჭ-ნაწლავიდან კალციუმის შეწოვას, ამიტომ სასურველია, შვრია (ჰერკულესი) პერიოდულად ჩაანაცვლოთ წიწიბურით, ქერით, ბრინჯით...
კითხვა: 4 წლის ბავშვს პირის გარშემო სილურჯე აქვს. რისგან შეიძლება იყოს გამოწვეული. ბავშვს არაფერი აწუხებს, ძალიან ენერგიულია.
პასუხი: ბავშვი საჭიროებს კარდიოლოგისა და ნევროპათოლოგის კონსულტაციას.
კითხვა: ვიტამინი B12-ს (კობალამინს) თუ აქვს ჰორმონების მოსაწესრიგებელი თვისება?
პასუხი: ვიტამინი B12 მონაწილეობს მელატონინის სინთეზში (ძილის ჰორმონი), რომელიც ორგანიზმს ეხმარება უძილობის დაძლევასა და ძილ-ღვიძილის რეჟიმის ცვლილების ადაპტაციაში.
კითხვა: ექიმმა დამინიშნა მაგნეფარი B6 ვიტამინი. ვარ დიეტაზე და მაინტერესებს, ეს ვიტამინი წონის მატებას ხომ არ უწყობს ხელს?
პასუხი: მაგნეფარი B6-ს არ აქვს წონაში მომატების ეფექტი, თუ თქვენ იცავთ სწორი კვების რეჟიმს, აკონტროლებთ საკვებით მიღებულ კალორიებს, ვარჯიშობთ, რაიმე ტიპის ენდოკრინული დარღვევა არ აღგენიშნებათ, მოწესრიგებული გაქვთ კუჭ-ნაწლავის ფუნქციონირება, მაშინ წონაში მომატების შიში ნუ გექნებათ.
კითხვა: ვარ 86 წლის აბსოლუტურად ჯანმრთელი. არასოდეს ლოთი არ ვყოფილვარ, ახლა დავიწყე დილით 50 გრამი, ვახშმობისას კი 100 გრამი სუფთა, უშაქრო არყის დალევა და მაინტერესებს მავნებელი ხომ არ იქნება?
პასუხი: თუ დისკომფორტი არ გექმნებათ და ამასთან დაკავშირებით რაიმე ჩივილი არ გაგიჩნდათ, დღეში 50, მაქსიმუმ, 100 გრამი სრულიად უსაფრთხო იქნება.
კითხვა: რამდენ ხანში გამოჩნდება ანალიზში C ან B ჰეპატიტით დაინფიცირება?
პასუხი: ჰეპატიტის მწვავე მიმდინარეობისას დაავადება სისხლში 6-8 კვირის შემდეგ გამოვლინდება. ჰეპატიტზე სისხლის ანალიზის ჩატარება მიზანშეწონილია სავარაუდო ინფიცირებიდან 2-3 თვის შემდეგ, რადგან ეგრეთ წოდებული, ინკუბაციური პერიოდის ადრეულ სტადიაზე დაავადება ანალიზით შესაძლოა, არ გამოვლინდეს.
რუბრიკას უძღვება ოჯახის ექიმი
მაია ნუცუბიძე