ლუკა ბერულავა: დავიბადე მოსკოვში  2002 წლის 27 ნოემბერს. 17 წლის ვარ. დაახლოებით, ოთხი წლის ვიყავი, როცა ტელევიზიით გადაცემა ледниковый период-ის პირველი სეზონი გადიოდა. სწორედ ამ გადაცემამ მოახდინა ჩემზე დიდი გავლენა და გამიჩნდა უსაზღვრო სურვილი, რომ ერთ-ერთი წარმატებული ფიგურისტი მეც გავმხდარიყავი. ჩემი მშობლები თავიდანვე ზრუნავდნენ ჩემი და ჩემი დის მომავალზე. გაითვალისწინეს ჩემი უდიდესი სურვილი და ინტერესი ფიგურული სრიალის მიმართ და გადაწყვიტეს შევეყვანეთ სპორტის ამ სახეობაზე.  უბედნიერესი ვიყავი, როცა საქართველოს ფიგურული სრიალის ფედერაციამ საქართველოს სახელით გამოსვლა შემომთავაზა. ეს ჩემთვის დიდი პატივია.

–  ალინა ბუტაევა 14 წლის არის, ქალაქ ყაზანშია დაბადებული. მე და ალინამ წყვილთა კატეგორიაში სრიალი, დაახლოებით, ორი წლის წინ დავიწყეთ, ხოლო კონკურსებში მონაწილეობა კი – 2019 წლის აგვისტოს თვიდან. ქედმაღლობაში რომ არ ჩამეთვალოს, ველოდებოდით ამ გამარჯვებას, რაც ჩვენი და ჩვენი მწვრთნელების შრომის დამსახურებაა.

– ამაყი ვარ, რომ საქართველო პირველად წარმოვაჩინეთ ფიგურული სრიალის წყვილთა კატეგორიით და პირველი ადგილი და პირველი ოქროს მედალიც დავიმსახურეთ. ჩვენ მივიღეთ მონაწილეობა გრან-პრის ეტაპში ქალაქ რიგაში და ქალაქ ზაგრებში, სადაც მოვიპოვეთ ოლიმპიური ლიცენზია, აგრეთვე, მივიღეთ მონაწილეობა „ჩელენჯის“ ორ ეტაპში. ამჟამად თავდაუზოგავად ვემზადებით ოლიმპიადისთვის, რომელიც 2020 წლის იანვარში გაიმართება შვეიცარიაში.

– ფიგურული სრიალი ნამდვილად სპორტის სახიფათო სახეობაა. რა თქმა უნდა, ტრავმებიც მიგვიღია, მაგრამ საგანგაშო და სერიოზული არაფერი. ვცდილობთ, გავუფრთხილდეთ ჩვენს ჯანმრთელობას.