კვირის ყველაზე სკანდალურ გმირად მაინც  და ისევ საქართველოს პრეზიდენტი რჩება. ,,სალომეადას“ იუმორისტულ-ეპატაჟურ ჟანრს ამჯერად საოცრად ფრანციცული და ლამის ანტიეროვნულად შერაცხული  წინადადება შეემატა.  საქართველოს პრეზიდენტი სალომე ზურაბიშვილი საქართველოსა და კავკასიის შემსწავლელი მეცნიერებების საკოორდინაციო ცენტრის შექმნასთან დაკავშირებულ ღონისძიების გახსნაზე სიტყვით გამოვიდა.

  „არც ჯარი გვაქვს, არც იარაღი და არც გვექნება. არც ის ეკონომიკური ძალიან დიდი პოტენციალი, რომ უცებ დავიპყროთ თუნდაც რეგიონი“...

  რისი თქმა უნდოდა ქალბატონ პრეზიდენტს ამ წინადადებით ანდა რომელი რეგიონის დაპყრობის მილიტარისტულ ზრახვებს შეუპყრია ის, რთული დასადგენია. ალბათ, ენათმეცნიერების ინსტიტუტმა მისთვის ცალკე განმარტებითი ლექსიკონი უნდა გამოუშვას, თუმცა პრეზიდენტის ამ წინადადებას მაშინვე გაემიჯნენ საქართველოს  პრემიერ-მინისტრი და თავდაცვის მინისტრი. ეჰ, სალომე, რა შენი საქმეა  თავდაცვა და უსაფრთხოება, დიდი კალიბრის იარაღი და ტყვიამფრქვევი, ჯაველინები და ტანკსაწინააღმდეგო სისტემები...   თავდაცვა და დემოკრატია ლობიოს ჭამა ხომ არ გგონია, ქალო?!