გიორგი ვეფხვაძე (მმართველი პარტნიორი): ჩვენს კომპანიას სტანდარტული აუდიტორული და საკონსულტაციო კომპანიებისგან განსხვავებული მიდგომები აქვს. ჩვენ ვთავაზობთ  კომპლექსურ მომსახურებას, რაც  არა მხოლოდ  აუდიტორულ მომსახურებას გულისხმობს, არამედ ბუღალტრულ მომსახურებას, იურიდიულ და სამართლებრივ მომსახურებას სხვადასხვა დავების დროს, იქნება ეს კერძო კომპანიებთან  თუ სახელმწიფო უწყებებთან. ჩვენს მომსახურებაში შედის კომპანიების დახმარება, მაგალითად: გრანტების მიღებაში, სხვადასხვა სახელმწიფო პროგრამებში მონაწილეობისათვის საჭირო დოკუმენტაციის მომზადებაში და ასე შემდეგ.  ჩვენთან ნებისმიერი ხელშეკრულება,  აქტი, შეთანხმება თუ მემორანდუმი ორმხრივად განიხილება.

– საქართველოში ბუღალტრების ინსტიტუცია ჯერ კიდევ ძალიან დაბალ დონეზეა, შეიძლება ითქვას, ახლა იდგამს ფეხს. ცოტა ხანში, ალბათ, ბუღალტერთა და აუდიტორული კომპანიების ზედამხედველობის სამსახური შემოიღებს კანონს, რომლის მიხედვითაც მოხდება არა მხოლოდ აუდიტორების, არამედ ბუღალტრების სერტიფიცირება. ბუღალტერი უნდა ადასტურებდეს თავის კვალიფიკაციას, თქვენ წარმოიდგინეთ, დეკლარაციის გაგზავნაც მასზეა დამოკიდებული. ის ურთიერთობს ბანკებთან, სახელმწიფო ინსტიტუტებთან და თუ მას არ ექნება განათლება და კვალიფიკაცია, შესაძლოა, ძალიან ცუდ სიტუაციაში აღმოვჩნდეთ.

– გაზაფხულისთვის ჩვენს ბაზაზე შევქმნით პროფესიული განათლების ცენტრს, რომელიც ხელს შეუწყობს არა მხოლოდ აუდიტორული, არამედ იურიდიული და ფინანსური მიმართულებების განვითარებას, განათლების დონის ამაღლებას, ამ პროფესიებში უფრო ღრმად ჩახედვას და პრაქტიკული უნარ-ჩვევების შეძენას. ცენტრში პედაგოგებად იქნებიან მოწვეული პრაქტიკოსი, მაღალკვალიფიციური ლექტორები, რომლებიც წლების მანძილზე დაგროვილ საკუთარ ცოდნას და გამოცდილებას ჩვენს სტუდენტებს გაუზიარებენ. მათთან მოლაპარაკებები უკვე დასრულებულია, ამჟამად  ვეძებთ ადგილს სასწავლო ცენტრისთვის, რომელიც გვინდა, რომ ადვილად მისადგომი იყოს. სწავლის პროცესი თავიდან ბოლომდე შეკრული და ქართულ რეალობაზე მორგებული იქნება. სალექციო განრიგი გათვალისწინებული იქნება სტუდენტებისთვის და მათთვის, ვინც დღის განმავლობაში დაკავებულია. ლექციები იქნება როგორც დილის საათებში, ისე საღამოს. ჩვენს ცენტრში სტუდენტებს საშუალება ექნებათ, ხუთწლიანი გამოცდილება ორ წელში დააგროვონ. გვაქვს იმედი, რომ ჩვენი სასწავლებელი გახდება ერთ-ერთი საყრდენი ჩვენი პროფესიის განვითარებისთვის.

– პირველ რიგში, საჭირო იქნება უმაღლესი ეკონომიკური განათლება. სტუდენტებს ტესტირების საფუძველზე შევარჩევთ. რაც შეეხება დასაქმებას, რა თქმა უნდა, საუკეთესო სტუდენტებს ხელიდან არ გავუშვებთ და შევთავაზებთ ჩვენთან დასაქმებას.

– უცხოურ კომპანიებთან თანამშრომლობის დიდი გამოცდილება გვაქვს და მათი რეკომენდაციით დაგვიკავშირდა საერთაშორისო აუდიტორული კომპანია Finexpertiza. საქართველოში არსებული სიტუაციებიდან გამომდინარე, ბევრი ვიფიქრეთ, ავწონ-დავწონეთ და ერთწლიანი მოლაპარაკებების შემდეგ დავთანხმდით წევრობაზე. გავაფორმეთ მემორანდუმი და გავხდით  Finexpertiza-ს წევრი, რაც მოგვცემს საშუალებას,  ჩვენს პარტნიორ ორგანიზაციებს, ვისაც ჩვენ ვუწევთ მომსახურებას, სამომავლოდ ძალიან ბევრი სიახლე შევთავაზოთ, ვიდრე ამ ეტაპზე ვთავაზობთ.

ლევან გუგუშვილი (მმართველი პარტნიორი): დღეს საქართველოში აუდიტორები, ბუღალტრები და ბიზნესმენები ერთმანეთისგან დამოუკიდებლად მუშაობენ, რაც იწვევს რიგ პრობლემებს. რაც  გამართლებულია ბუღალტრული თვალსაზრისით, შესაძლოა, გაუმართლებელი იყოს იურიდიული თვალსაზრისით ან, პირიქით. ბიზნესისთვის მნიშვნელოვანია, რომ ისინი ერთიანი პრინციპით მუშაობდნენ.

Finexpertiza-სთან მემორანდუმის გაფორმების გადაწყვეტილების მიღებისას ერთ-ერთი მთავარი ფაქტორი ის იყო, რომ ძალიან დიდი სამომავლო შესაძლებლობები დავინახეთ.