აკაკისეულ ორაზროვან იუმორზე ლეგენდები დადიოდა, ამ საქმეში მას სწორი არ მოეძებნებოდა. დიდ მგოსანს შეფარული პოლიტიკური ტექსტებიც ჰქონდა დაწერილი, სადაც ფარულად ჩადებულ აზრს ყველა ვერ ამოიკითხავდა, განსაკუთრებით არაქართულენოვანი. გავრცელებული ვერსიით, ლექსი – „გურული ნანინა“ მგოსანმა ლალა გოგოლაშვილს მიუძღვნა. მასში ასეთი სტროფებია:

  „ჯერ აკვანში ჩაკრული ხარ,

გასალტული და იწვალე!

გაიზრდები, სხვა იქნები,

ოი, ამას ვენაცვალე!“

  ამ ლექსის პოლიტიკური ორაზროვნება კი ისაა, რომ 1905 წელს, რუსეთ-იაპონიის ომის დროს, იაპონელმა მარშალმა ოიამა ივაომ რუსულ ჯარს დიდი ზიანი მიაყენა და პატრიოტი ქართველი პოეტი ასე ოკუპანტის (რუსეთის) დამმარცხებელს ასხამს ხოტბას – ლექსის თითოეული სტროფი მთავრდება ფრაზით – „ოი, ამას ვენაცვალე“.