პასუხი: ეს არის აქვაგენური ქავილი – ალერგია წყლის მიმართ, მისი სხვადასხვა ტიპი არსებობს, იშვიათია,  თუმცა ალერგოლოგებისთვის კარგად ნაცნობია. აქვაგენური ალერგიის ერთ-ერთი შესაძლო მიზეზი ჰემატოლოგიური პათოლოგიაც არის. ჰემატოლოგიური ქავილის მიზეზად შესაძლოა იქცეს რკინის დეფიციტი, მიელოდისპლაზიური სინდრომი, თრომბოციტემია, ჭეშმარიტი პოლიციტემია.  ჭეშმარიტი  პოლიციტემია  პათოლოგიაა, რომლის დროსაც ძვლის ტვინი ჭარბად წარმოქმნის სისხლის წითელ უჯრედებს – ერითროციტებს. პოლიციტემია შესაძლოა, გამოვლინდეს სისხლის თეთრი უჯრედებისა და თრომბოციტების სიჭარბითაც. ამ პათოლოგიის მქონე ადამიანების 50-70 პროცენტი უჩივის ქავილს. ჰემატოლოგიური ქავილის ამ სახეობას ხშირად უწევს პროვოცირებას ნებისმიერი ტემპერატურის წყალთან კონტაქტი (მაგალითად, ქავილი შეიძლება აღმოცენდეს აბაზანის ან შხაპის მიღებისას ან მიღებიდან რამდენიმე წუთის შემდეგ), ამიტომ მას ზოგჯერ აქვაგენურ ქავილსაც უწოდებენ. მიზეზი უმეტესად ცხელი წყალია, ცივი – შედარებით ნაკლებად. ქავილთან ერთად, დამახასიათებელია ღაჟღაჟა ტუჩები, ლოყები, ცხვირი და ყურები. ზოგჯერ უჩივიან თავის ტკივილს, მხედველობის დარღვევას, წონის კლებას, ღამის ოფლიანობას, თავბრუს. შესაძლოა, აღენიშნებოდეთ არტერიული ჰიპერტენზია და სპლენომეგალიაც (ელენთის გადიდება). ქავილი პოლიციტემიის საკმაოდ სპეციფიკური სიმპტომია, რომელმაც შესაძლოა, დაავადების დიაგნოზის დასმამდე რამდენიმე წლით ადრე იჩინოს თავი. ზოგჯერ იმდენად ძლიერია, რომ პაციენტები უარს ამბობენ აბაზანის ან შხაპის მიღებაზე.

პასუხი: პირველ რიგში, მიმართეთ ოტო-რინო-ლარინგოლოგს, შემდეგ გაირკვევა საჭიროა თუ არა ალერგოლოგის კონსულტაციაც.