რუსული საინფორმაციო საშუალებების ცნობით, რუსეთის ტერიტორიაზე რძისა და ხორცპროდუქტების პირადი მოხმარებისთვის შემოტანის აკრძალვას აპირებენ.

ამ ინიციატივით მთავრობას ხორცის ადგილობრივმა მწარმოებლებმა მიმართეს.  

რატომ?

რადგან შიშობენ, რომ ამ გზით ქვეყანაში (მაშასადამე, რფ-ში) შესაძლოა, ცხოველთა საშიში დაავადებების გამომწვევები მოხვდეს.

მეტიც, არა მხოლოდ რფ-ის მოქალაქეები გაკონტროლდებიან მკაცრად (უცებ პირი პარმეზანზე რომ არ წაუცდეთ), არამედ ტურისტებიც, ასეთი თხოვნით მიმართა ხორცეულის ნაციონალურმა ასოციაციამ  ვიცე-პრემიერ ალექსეი გორდეევს.

თუ შემოტანილი პროდუქცია დაავადებულია, ვირუსი სწრაფად გავრცელდება მთელი რუსეთის უზარმაზარ ტერიტორიაზე, მათ შორის, საკვების ნარჩენების საშუალებითაც (ჰაერით და გარეული ცხოველების მიერო).

თუ გავიხსენებთ, რომ სანქციებამდე უცხოური პროდუქცია ოხრად შედიოდა რფ-ის ტერიტორიაზე და მშვენივრადაც ირგებდნენ მისი მოქალაქეები, იმას გარდა, რომ მათი საქონელიც (შინაურიც და გარეულიც) ფრიად ჯანმრთელად გრძნობდა თავს, არც ისაა გამორიცხული, რომ აპირებენ რფ-ის მოქალაქეებს საერთოდაც გადაავიწყონ ყველისა და ხორცის გემო.

მეორე მხრივ კი, რაკი ასე შფოთავენ, იქნებ უცხო ტერიტორიების მიტაცებისასაც გაფრთხილებულიყვნენ, ვინ იცის, რა დაავადებებს ინახავს სხვების მიწა?! -