№38 მიწების შემგროვებლები
„ერთგული“ ორგულები
როგორც ჩანს, ჩრდილოეთში ისე გაუტკბათ ტერიტორიების მითვისება და აღიარებები, რომ რუსეთის ფედერაციის კომუნისტური პარტიის თავკაცმა, გენადი ზიუგანოვმა პრ. პუტინს დონბასის დაუყოვნებლივ შეერთება შესთავაზა, რათა ეს „ბანდიტიზმი დამთავრდესო“ (ანუ უკრაინის ბრძოლას საკუთარი ტერიტორიისთვის რუსულად ბანდიტიზმი ჰქვია).
მანამდე კი დონბასისა და ლუგანსკის თვითგამოცხადებული რესპუბლიკების აღიარება მოითხოვა (როგორც აფხაზეთი და „იუჟნაია ოსეტია“ ვაღიარეთო), იმიტომ რომ დონბასსა და ლუგანკსში რუსეთელების მეგობრები და ნათესავები ცხოვრობენო და, საერთოდაც, მთელი საბჭოთა ხალხის აშენებული რეგიონიაო.
მართალია, რფ-ის ხელისუფლება დუმს და თებერვალში ლავროვი ირწმუნებოდა (კითხვის პასუხად, აპირებენ თუ არა უკრაინული სეპარატისტული რეგიონების ცნობას), რომ მოსკოვი მკაცრად იცავს მინსკის შეთანხმებას, იმიტომ რომ „თავისი სიტყვის ერთგულია“, თუმცა, „ბლუმბერგის“ ცნობით, ივლისში ვლ. პუტინს დნ. ტრამპისთვის დონბასში რეფერენდუმის ჩატარება შეუთავაზებია (საერთაშორისო ეგიდით).
თუ გავიხსენებთ, რომ რფ-ის მოსახლეობა 140 მილიონია და დედამიწის მერვედს იკავებენ, გაუგებარია, რატომ აგროვებენ ამდენ მიწას, ვითომ ეჭვობენ, რომ დასამარხ ადგილებს ვერ იმყოფინებენ?!