№19 მდგმურები
ეს ჩვენი ქვეყანა და, მათ შორის, განსაკუთრებით, დედაქალაქი ლამისაა ტურისტულ მექად იქცა, ამიტომაც, ცხადია, რომ ტურისტები გაგვიმრავლდა, რაც, ბუნებრივია, მისასალმებელიცაა და სასიხარულოც.
იმიტომ რომ, ჯერ ერთი, შემოსავალია ბიუჯეტისთვის, სამუშაო ადგილებიც მრავლდება და ჩვენს ქვეყანასაც უფრო მეტი და მეტი ადამიანი ცნობს და იცნობს.
მიუხედავად ამ სასიხარულო რეალობისა, პრობლემად რჩება გიდები: ერთი მხრივ, ამ ჩვენს ქვეყანაში გიდობს ყველა, ვისაც არ ეზარება (და, უპირველესად, სამუშაო ადგილს ართმევს ჩვენს თაანამოქალაქეებს) და, რაც მთავარია, ტურისტებს საქართველოს ისტორიაზე თავისთვის სახეირო ვერსიას უყვება (ამაში ჩვენი თანამემამულე გიდებიც შეიძლება, სცოდავდნენ), იმას გარდა, რომ საძიებო სისტემები საქართველოს ისტორია-კულტურის შესახებ ინფორმაციის დიდი სიმწირით გამოირჩევა (ძირითადად, დეზინფორმაციაა ჩვენი მეზობლების ხელით გავრცელებული, მათ შორის, ქართულ ენაზეც კი).
უფრო მეტიც, სავარაუდოა, რომ გიდების საფარქვეშ, არც მეტი, არც ნაკლები, უცხო ქვეყნის სპეცსამსახურიც მოქმედებდეს (ცხადია, ანტიქართული ინტერესის გასატარებლად), ამ ჩვენს კულტურის სამინისტროს კი, მთავრობასთან უნისონში, როგორც ჩანს, ღრმად ჩასძინებია და, თუ დროზე არ გამოიღვიძებენ, არც ისაა გამორიცხული, ერთ მშვენიერ დღეს აღმოვაჩინოთ, რომ ამ ჩვენს ქვეყანაში მდგმურები ვართ.