№7 „ჯადოქრები“
ანუ მოხარშული სულ სხვაა
მაშინ, როდესაც გერმანიის ერთ-ერთ რეგიონში მოსთქვამენ, რომ ქართველების გამო ღამით მშვიდად ვერ დაუძინიათ და გერმანიის უმაღლესი საკანონმდებლო ორგანოსგან საქართველოსთვის უვიზო რეჟიმის გაუქმებას მოითხოვენ (პათოსით: დაგვიბრუნეთ მშვიდი სიზმრები და თავისუფლებაო!), გერმანიის ტრადიციულ კარნავალ „ფაშინგზე“ გერმანელ ჯადოქრებს, არც მეტი, არც ნაკლები, ახალგაზრდა გოგონა მოუხარშავთ.
ინციდენტი ქალაქ ეპინგენში მომხდარა და ჯადოქრულად ჩაცმულ-დახურულ ადამიანებს 18 წლის გოგონა მდუღარე ქვაბში ჩაუგდიათ.
საბედნიეროდ, რიტუალის მსხვერპლი გადარჩა, თუმცა მეორე ხარისხის მძიმე დამწვრობები მიუღია და დღემდე მკურნალობენ. აი, „ჯადოქრებს“ კი ეძებენ და დღემდე ვერ უპოვიათ.
ჰოდა, მეტად უცნაურია, რომ მსგავსი ამბავი კი არა, ძარცვა ასიზმრებთ ამ ჩვენს მეგობარ გერმანელებს კოშმარებს, თუ, რა თქმა უნდა, ისინი არ იზიარებენ პიპინიას ლოგიკას: ვიყავი მკაცრი ადამიანებთან (ამ კონკრეტულ შემთხვევაში, ქართველებთან), მაგრამ ნაზი – ცხენებთან (ამ კონკრეტულ შემთხვევაში, ჯადოქრებთან). –