№25 „ქებაი საკვირველი“
ანუ გენეტიკის მადლი
მართალია, უკვე მივეჩვიეთ, რომ ჩრდილოატლანტიკური ალიანსი კოალიციის სამხედრო ოპერაციებისთვის ყოველთვის დიდ მადლობას გვიხდის, ოღონდ იქვე დასძენს, რომ ეს საკმარისი არ არის „ნატოს“ წევრობისთვისო, მაგრამ ბოლო დითირამბებმა თვით ჩვენს მოლოდინსაც კი გადააჭარბა.
ასეა თუ ისე, რაკი მადლობაც საქმეა, ჩვენც მადლობლები ვართ. თუმცა სულ ახლახან „ნატოს“ გაერთიანებული შეიარაღებული ძალების ყოფილმა მთავარსარდალმა ფილიპ ბრიდლავმა განაცხადა (არადა ოთხვარსკვლავიანი გენერალია), საქართველოს „ნატოში“ უფრო მეტი წვლილი აქვს შეტანილი, ვიდრე სარგებელი მიუღიაო.
მეტიც, სამხედრო თვალსაზრისით, ალიანსის მისიებში საქართველოს მონაწილეობა სამაგალითოაო.
და, რაც მთავარია (მომყავს ციტატა): „იყო დრო, როდესაც ვამბობდით, ჩვენი ავღანეთის მისიისთვის ვიცე-მეთაური რომ დაგვჭირვებოდა, აუცილებლად ქართველს შევარჩევდით.“
ქება, თანაც, საფუძვლიანი, მართლაც, საამოა, ოღონდ, რა თქმა უნდა, ქართველს შეარჩევდნენ, რადგან ეს გენეტიკური უნარია, განა იმიტირებულ საომარ გარემოში ნასწავლი?! –