ანუ „არჩევნებ-არჩევნებში სეპარატისტები დაორსულდნენო“…

 ამ ჩვენს სეპარატისტულ ცხინვალის რეგიონში მორიგი სეპარატისტული „არჩევნებიც“ ჩატარდა  და, თქვენ წარმოიდგინეთ, თვით მეორე ტურიანიც, რომელშიც ბიბილოვმა სძლია თიბილოვს (თუმცა ჩვენთვის რა – თიბი და რა – ბიბი).
აქვე გეტყვით, რომ აქამომდე ანატოლი (ბიბილოვი) „იუჟნაია ოსეტიას“ „პარლამენტის“ „ვიცე-სპიკერი“ გახლდათ, „საპრეზიდენტოში“ კი ლეონიდს (თიბილოვს), რომელმაც ხმათა 40 პროცენტი დააგროვა, 58 პროცენტით სძლია, რის შედეგადაც, აწ უკვე „იუჟნაია ალანიელი“ „პრ“-იც გახდა (ან კი როგორ ვერ გახდებოდა „პრ“-ი, როდესაც „რეფერენდუმიც“ ჩაატარეს და სახელიც გადაირქვეს).
ძლევა მთლად საკვირველიც ვერ გამოდგა, რადგან „არჩევნებში“, ჰა და ჰა, ერთი ქელეხის ხალხმა მიიღო მონაწილეობა?!
ჩემთვის გაუგებარი დამსახურების გამო, ახალი „პრ“-ი ანატოლი (ბიბილოვი) „ბი ბი სის“ რუსული სამსახურის ყურადღების ცენტრშიც მოხვდა (მისგან ინტერვიუ აიღეს) და მათ რიხით განუცხადა, რომ „ასპროცენტიანია გარანტია, რომ „იუჟნაია ოსეტია“ რუსეთის შემადგენლობაში მოხვდეს.“
ცხადია, ანატოლიმ, მამა-ბაბუამ რომ დაუტოვა, ის შეუერთოს, რასაც უნდა, მაგრამ საქმეს ისეთი პირი უჩანს (შეგვაერთეთ-შეგვაერთეთო), არც ისაა გამორიცხული, რომ ამ (განა ბწკენა-ბწკენაში?!) „არჩევნებ-არჩევნებში,“ ეს სეპარატისტები თვალსა და ხელს შუა არ დაგვიორსულდნენ?! –