ანუ დანა ნაცარში ჩაუვარდაო

შესაძლოა, იმიტომ რომ, ეს ჩვენი ენა იმთავითვე აღიარებს სქესთა შორის თანაბრობას: დედა-კაცი – მამა-კაცი, გასულ კვირას ქუთაისში მომხდარმა იმ ეჭვის საფუძველი აღძრა, იქნებ და დედა-კაცი მამა-კაცზეც უპირატესია?!
კერძოდ, ღამით, ერთ-ერთ მაღაზიას, რომელშიც იმ დროისთვის ორი თანამშრომელი (ახალგაზრდა გოგონა) იმყოფებოდა, თავს შეიარაღებული მძარცველი დაესხა, ცხადია, თანხის გამოძალვის მიზნით.
თუმცა ყაჩაღს კოვზი, ამ კონკრეტულ შემთხვევაში, დანა ნაცარში ჩაუვარდა, ვინაიდან ერთმა გოგონამ სცემა, მეორემ კი პატრულს დაურეკა.
 მომყავს ციტატა (მომგერიებლების): „ალბათ, ეგონა, რომ რადგან გოგონები ვიყავით, შეგვაშინებდა, მაგრამ პირიქით მოხდა. არ შევშინდი და საკუთარი ხელებით ვცემე. ისეთ დღეში ჩავაგდე, პატრულის მოსვლას ნატრობდა“.
აქედან გამომდინარე კი, პიპინიას ცნობილი გამონათქვამი („ერიდე ქალს, განსაკუთრებით, ევროპის ტერიტორიაზე“) ითხოვს პერიფრაზს: ერიდე ქალს, განსაკუთრებით, ღამით და საქართველოს ტერიტორიაზე! –