ყველაფერს ვხედავ, ყველაფერს ვამჩნევ

 ის, რომ ჩვენს ომბუდსმენს საქმე თავზე საყრელად აქვს, შეუიარაღებელი თვალითაც ნათელია. ან კი როგორ ვერ იქნება (ნათელი), როდესაც ნორჩი დემოკრატიისა და, ზედაც, განვითარებადსტატუსიანები ვართ.
მეორე მხრივ, საქმე კი თავზე საყრელად აქვს, მაგრამ, როგორც ჩანს, ისეთი ჩაუქია, ყველაფერს ხედავს და ყველაფერს ამჩნევს.
ჰოდა, რაკი ასეთია, მის მახვილ თვალს არც ერთ-ერთი საცურაო აუზის ტერიტორიაზე გამოკრული შემდეგი განცხადება გამოჰპარვია: „ძვირფასო ქალბატონებო, კრიტიკულ დღეებში აუზში ჩასვლა აკრძალულია“.
მეტიც, ამ განცხადებაში სექსიზმიც აღმოუჩენია, მოტივით: წარწერა გენდერული სტერეოტიპების გამყარებას უწყობს ხელსო.
ხოლო, რაკი, ბ-ნი ნანუაშვილის შეფასებით, „ვინაიდან მენსტრუაციული ციკლი არის უნიკალური მდგომარეობა, რომელიც მხოლოდ ქალებისთვისაა დამახასიათებელი“, საცურაო აუზის მესვეურთ რჩევით მიმართა, რომ ნებისმიერი ამკრძალავი წარწერა გენდერულად ნეიტრალური ფორმით ჩამოაყალიბონ.
რაკი ჩემთვის უცნობია, როგორ უნდა ჩამოყალიბდეს ნეიტრალური ენით ზემომოტანილი მიმართვა, ვეჭვობ, მამათაც ჰქონიათ წესი, დედათა მსგავსად და მე ამ სიახლეს ჩამოვრჩენილვარ?! –