ანუ ვინ რისთვისაა მზად?!

 გასულ კვირას „ევროატლანტიკური საქართველოსთვის“ კოალიციამ ხელისუფლებას მოუწოდა, მკაფიოდ განსაზღვრე პოლიტიკა რუსეთის მიმართო. მოუწოდა რა, განცხადებით მიმართა, რომელშიც შენიშნა, რომ რუსულ ოკუპაციასთან საბრძოლველად უაღრესად მნიშვნელოვანია სწორი და თანმიმდევრული დიპლომატიური სტრატეგია და მისი მიზანმიმართული განხორციელება (დასტურ!).
ამასთან, ისიც დასძინეს, რომ სამოქალაქო საზოგადოების ჩართულობით შეიმუშაოს (ხელისუფლებამ) დეოკუპაციის მკაფიო და მიზანმიმართული სტრატეგია; ასევე, მაქსიმალურად გამოიყენოს ყველა დიპლომატიური და ინფორმაციული საშუალება და საერთაშორისო ტრიბუნა, რუსეთის მიერ საქართველოს ტერიტორიების ოკუპაციასა და მიმდინარე პროცესებზე საერთაშორისო საზოგადოებრიობის სრული ინფორმირებისთვის.
ცხადია, ამ სურვილსა და მოწოდებას რთულია, არ დაეთანხმო, ოღონდ არსებული გეოპოლიტიკური კონტექსტის გათვალისწინებით (ბასრი დანის წვერზე გადის არათუ საქართველო, მთელი რეგიონი), არც იმის მიხვედრაა რთული, რა შეიძლება, მოჰყვეს ხისტ მოძრაობებს.
თუმცა, თუ გავითვალისწინებთ, რომ განცხადებას ხელს უამრავი ორგანიზაცია აწერს, მტკიცედ გვწამს, რომ რუსული აგრესიის შემთხვევაში, ხელმომწერები – მამაკაც-დედაკაციანად, წინა ხაზზე საბრძოლველად მზად არიან! –