ანუ ესროლე პირდაპირ ფეხებში!

ერთი მხრივ, აშშ-რუსეთის ურთიერთობა ისე დაიძაბა, რომ არც ისაა გამორიცხული, თავში რაკეტა მოგვხვდეს (აბა, ერთმანეთს ხომ არ ესვრიან?!), მეორე მხრივ, ჩრდილო კორეამ განაცხადა, რომ რუსეთისთვის მზადაა, აშშ-ს სამხედრო ობიექტებს თავისი რაკეტები მიუსიოს. თანაც, განა – უბრალო, თვით – ბირთვული!
ამგვარი განცხადების მიზეზი კი ის გამხდარა, რომ, ჩრდილო კორეელთა აზრით, აშშ ხელს უშლის რფ-ს ალეპოს დაბომბვაში (შეგახსენებთ, ალეპოში ბაშარ ასადის ოპოზიციაა გამაგრებული, რომელსაც მხარს აშშ უჭერს).
ჩრდილოკორეელებს იმაზეც მოკვდომიათ გული, რომ აშშ დიდ რეკლამას უწევს თავის სამხედრო-ტექნიკურ შესაძლებლობებ-უპირატესობებს, ამიტომაც მეგობრის გამო, ყველაფრისთვის მზად არიან: როგორც თავდაცვისთვის, ისე თავდასხმისთვის.
სახელდობრ, ჩრდილო კორეის სტრატეგიული ჯარები მზად არიან, პლანეტა დედამიწის ნებისმიერ წერტილზე, როგორც ხმელეთზე, ისე წყალში (პათოსით: „ჩვენი გმირები დასცხებენ ზარბაზნებით, თოფებით და ტანკებით“); მეტიც, მათ რაკეტებს უკვე ამოუღიათ კიდეც მიზანში ამერიკული სამხედრო ბაზები და ობიექტები.
აქვე შეგახსენებთ, რომ 2020 წლამდე ჩრდილო კორეას 20-დან 100-მდე ბირთვული იარაღი ექნება.
ჩვენ არ ვიცით, რა მოუფრინდება თავში ჩრდილო კორეის ლიდერს, მაგრამ საქმეს კოჭებშივე ეტყობა, რომ ან აქედან, ან იქიდან, არ აგვცდება. –