გასული საუკუნის 20-იან წლებში კომუნისტებმა კონსტანტინე გამსახურდია დააპატიმრეს და თეთრ ზღვაში, მურმანსკის მახლობლად მდებარე კუნძულ სოლოვკის ყველაზე მკაცრი რეჟიმის ციხეში გაამწესეს. პავლე ინგოროყვამ „რკინის ქალამნები“ ჩაიცვა მეგობრის დასახმარებლად. მოსკოვში ჩავიდა და გასაქანი არ მისცა. ჩინოსანი სხვადასხვა მიზეზით უარს ეუბნებოდა თხოვნაზე, ხან კი, თავს არიდებდა მასთან შეხვედრას. ბატონი პავლეც არ ეშვებოდა, თუმცა მისაღებში მისულს მდივანი გოგო ტყუილს ეუბნებოდა – მინისტრი აქ არ არისო. ისიც იქვე ჩამოჯდებოდა და მოთმინებით ელოდა. ელოდა დილიდან საღამომდე. უხერხულ მდგომარეობაში ჩავარდნილი მინისტრი კაბინეტიდან გარეთაც ვერ გამოდიოდა. ბოლოს გამწარებულმა ბრძანა: ან ის გამსახურდია გამოუშვით, ანდა ეს ინგოროყვა დაიჭირეთო! კონსტანტინე გამსახურდია მალე გაათავისუფლეს.