მომავლიდან – წარსულისკენ

 სანამ, სახელდობრ, ჩვენ წინასაარჩევნო მარათონში ვართ ჩაბმულები (თუმცა რეგიონში ისეთი გადაჯგუფებებია, შესაძლოა, სკამებიც ოხრად დაგვრჩეს და ხმებიც – პირი ქვისკენ მიქნია!), ჩვენი სამხრეთელი მეზობლის (თურქეთის) უზენაესმა სასამართლომ (შვიდი ხმით ექვსის წინააღმდეგ) დაადგინა, რომ 2017 წლის 1 იანვრიდან სქესობრივი კავშირი 12 წლის ბავშვთან, ბავშვისვე თანხმობით, გაუპატიურებად აღარ ჩაითვლება.
ამის პარალელურად, ჩვენს ჩრდილოეთ სამეზობლოში (რფ) სამზეოზე გამოვიდა ინფორმაცია, რომ დაღესტანში ჩვეული მოვლენაა გოგონების წინდაცვეთა (კლიტორის ამოკვეთა და რიგ შემთხვევებში – სასქესო ბაგეების ამოკერვა), რათა ქალური ბუნება მხოლოდ გასამრავლებლად გამოიყენონ. რაც ყველაზე მთავარია: ამ პროცედურის ჩატარება ევალება დედას ექიმბაშთან ერთად, ცხადია, სრულფასოვანი გაყუჩების გარეშე და არც თუ სტერილურ პირობებში.
თუ გავითვალისწინებთ, რომ ჩრდილოეთიდან უშუალოდ სწორედ ჩრდილოეთ კავკასია გვესაზღვრება, სამხრეთიდან კი, ასევე, უშუალოდ – თურქეთი და მათთან არც თუ სასიამოვნო ისტორიული მოგონებები გვაკავშირებს, თუ ძველებური სახის დაბრუნება გადაწყვიტეს, ის დროც არ დაგვიბრუნდეს, როდესაც „ოთხ მეფეს სულ სისხლის ცრემლებით უტირია“…  –