„ხმები, კიდევ ხმები გინდა…“

 იმ მარტივი მიზეზით, რომ სკამი ყველას უნდა, არც მმართველი გუნდია გამონაკლისი. და რადგან არ არის, წინასაარჩევნოდ ისიც გააქტიურებულია, რადგან „ხმები, კიდევ ხმები გინდა“, რაც სავსებით ბუნებრივია.
მეორე მხრივ, ისიც ცხადია, რომ თითოეულ პოლიტიკურ ძალას თავისი გათვლა აქვს: ზოგი რფ-ის მოტრფიალეების გულის მონადირებას ლამობს, ზოგი – მედასავლეთეებისა, ზოგი – ახალგაზრდების და ზოგიც – სულ ყველასი ერთად.
ხელისუფლების საქმე ორმხრივ მომგებიანია: შეუძლია, დაპირებებიც გასცეს, როგორც გამარჯვების ერთ-ერთმა პრეტენდენტმა და პროექტებიც განახორციელოს, რადგან ხელისუფლებაა. და ჭეშმარიტად შლეგი უნდა იყო, რომ ეს საშუალება არ გამოიყენო.
ჰოდა, იყენებს, თუმცა ყველაზე საინტერესო მაინც პენსიონერებისთვის შეთავაზებული დასაქმების პროექტია და თუმცა ამ ინიციატივამ გამოიწვია კონტრრეაქცია, პათოსით: ჯერ ახალგაზრდები დაასაქმეთო, ვფიქრობ, წინასაარჩევნო გათვლა პრაგმატულია.
პრაგმატულია, იმიტომ რომ ამ ჩვენს დაბერებულ (დემოგრაფიულად) ქვეყანაში ამომრჩევლის ყველაზე დიდი სეგმენტი პენსიონერია (800 000-მდე). შესაბამისად, როგორც ჩანს, პოლიტიკაშიც აქტუალურია შეგონება: ხერხი სჯობია ღონესა, თუ პოლიტიკოსი მოიგონებსა. –