დღეს შემოგთავაზებთ განტვირთვის დღეების 2 ვარიანტს, ოღონდ, წინასწარ გაფრთხილებთ: ნუ გაგიტაცებთ ასეთი დღეების მოწყობა, რადგან მათი ხშირად განმეორებით ვერც სასურველ წონას მიაღწევთ (რადგან ეს აფერხებს გაცვლით პროცესებს ორგანიზმში) და ჯანმრთელობასაც საგრძნობლად დაიზიანებთ.

პირველი ვარიანტი – ვაშლი+წყალი
დღის რაციონი: 1,5 კილოგრამი ვაშლი (ან სხვა ხილი, ყურძნის, ბანანისა და ლეღვის გარდა) გაყავით 6 თანაბარ ნაწილად. თუ არ გიყვართ ან ვერ ინელებთ უმ (ცოცხალ) ვაშლს, შეგიძლიათ, აირღუმელში გამოაცხოთ.
დღის განმავლობაში უნდა დალიოთ 2-3 ლიტრი წყალი. თუ ძალიან გაგიჭირდათ შიმშილის დაძლევა, დღის რაციონი შეავსეთ 150 გრამი ხაჭოთი (გაყავით 3 თანაბარ ნაწილად).
კვებასა და კვებას შორის თანაბარი შუალედები დაიცავით.

მეორე ვარიანტი – ბოსტნეული+ზეითუნის ზეთი+წყალი
1,5 კილოგრამი სასალათე ბოსტნეული (კიტრი, პომიდორი, პატისონი, ბროკოლი, სტაფილო, ყვავილოვანი კომბოსტო, მოხარშული ჭარხალი, კამა, ოხრახუში, ნიახური) და 1-2 სადილის კოვზი ზეითუნის ზეთი გაყავით 6 თანაბარ ნაწილად. მინიმუმამდე დაიყვანეთ მარილის რაოდენობა.
შეგიძლიათ, ერთმანეთს ჩაანაცვლოთ სალათები და ბოსტნეულის სუპები.
დღის განმავლობაში დალიეთ მინიმუმ 2 ლიტრი წყალი. ამ შემთხვევაშიც, თუ ვერ დაძლიეთ შიმშილი, დღის რაციონს დაუმატეთ 150 გრამი მოხარშული თევზი ან ამდენივე მოხარშული ქათმის ფილე (გაყავით 3 ნაწილად).
სასურველია, ასეთი განტვირთვის დღეები მოაწყოთ მაქსიმუმ კვირაში 2-ჯერ: ჯერ ერთი ვარიანტი, შემდეგ – მეორე.
განტვირთვის დღეებში მძიმე ფიზიკური დატვირთვები მიზანშეწონილი არ არის. ამ დროს უმჯობესია, მეტხანს იყოთ წამოწოლილი ან ხანმოკლე დროით ნელი ნაბიჯით ისეირნოთ.