კითხვა: თუ შეიძლება, მასწავლეთ სკრაბის დასამზადებელი შინაური რეცეპტი (სახისთვის და სხეულისთვის).
პასუხი: 1) ფორთოხლის გამხმარი ქერქი დაფქვით ყავის საფქვავში, შეურიეთ არაჟანი (უნდა მიიღოთ სქელი კონსისტენციის მასა) და წაისვით სახეზე (თვალების ზონის გარდა), ყელსა და დეკოლტეზე. გაიჩერეთ 15-20 წუთი და შემდეგ წრიული მოძრაობით დაიმასაჟეთ სველი და გაწურული დოლბანდის ტამპონით. ჩამოიბანეთ გრილი წყლით და წაისვით თქვენი კანის შესაფერისი მკვებავი.
2) კაკლის ან თხილის ნაჭუჭი დაფქვით ყავის საფქვავში (1-2 სადილის კოვზი – გააჩნია, რამდენი გჭირდებათ), დაუმატეთ იმავე რაოდენობის არაჟანი, გახეხილი ბოლოკი და იმდენი გვირილის ნახარში, რომ ფაფისებრი მასა მიიღოთ. წაისვით პრობლემურ ადგილებზე და 20 წუთის შემდეგ გაიკეთეთ პილინგი. ჩამოიბანეთ ნელთბილი წყლით.
კითხვა: დილაობით შეშუპებული ქუთუთოებით ვიღვიძებ. არაფერი არ მჭირს, ალბათ, იმის ბრალია, რომ სიცხის გამო ბევრ წყალს ვსვამ. როგორ გავუმკლავდე ამ პრობლემას?
პასუხი: ამ პრობლემის მოსაგვარებლად გამოგადგებათ უკვე გამოყენებული ჩაის პაკეტი (პიტნის ჩაის, მწვანე ჩაის ან შავი ჩაის): კარგად გააგრილეთ ის, ოდნავ დაწურეთ და მჭიდროდ დაიფინეთ დახუჭულ თვალებზე 15 წუთის განმავლობაში. პერიოდულად პაკეტები შეაგრილეთ და ისევ დაიფინეთ.
კითხვა: ვიცი, რომ კვერცხის ნაჭუჭი ამაგრებს თმასა და ფრჩხილებს, მაგრამ, არ ვიცი, როგორ უნდა მივიღო. იქნებ თქვენ დამეხმაროთ?
პასუხი: კვერცხის ნაჭუჭი მართლაც არის კალციუმის წყარო, რაც აუცილებელია ძვლების, თმისა და ფრჩხილების გასამაგრებლად.
1 ცალი უმი კვერცხის ნაჭუჭი კარგად გარეცხეთ, მოაშორეთ შიგნიდან გამოკრული თეთრი აპკი, გააშრეთ და დანაყეთ ისე, რომ  ფქვილივით დაიფხვნას. შეურიეთ 1 სადილის კოვზი ახალგამოწურული ლიმონის წვენი (ასე უფრო კარგად შეითვისებს ორგანიზმი) და მოასხით სალათას დღეში ერთხელ.