კითხვა: ორ კვირაში ზღვაზე მივდივარ. ძალიან მეშინია სახის კანის დაზიანების. არსებობს თუ არა კანის დამცავი რამე წინასწარი პროცედურები?
პასუხი: თუ გაქვთ ამის საშუალება, საკმარისია, ჩაიტაროთ ბიორევიტალიზაციის კურსი – ჰიალურონის მჟავის ინიექციები. მათი რაოდენობა (1-დან 4-მდე) დამოკიდებულია თქვენს ასაკზე და კანის სიმშრალეზე. ჰიალურონის მჟავა აკავებს სითხეს უჯრედებში და უზრუნველყოფს ღრმა და ხანგრძლივ დატენიანებას; ნელდება კანის დაბერება და არ წარმოიქმნება ნაოჭები. ბიორევიტალიზაციის შემდეგ ეფექტი გრძელდება 6 თვემდე. მაგრამ თქვენ ყოველდღიურად უნდა გამოიყენოთ SPF-ის შემცველი დღის დამატენიანებელი კრემი.
კითხვა: რით არის სასარგებლო კანისა და ორგანიზმისთვის სანელებელი კურკუმა?
პასუხი: ინდოეთში ყოველდღიურად უმატებენ საკვებში კურკუმას, რადგან ის შეიცავს ნივთიერებას, რომელიც აახალგაზრდავებს ორგანიზმს, ეხმარება მას, გაუმკლავდეს მავნე წარმონაქმნებს, აწესრიგებს მენსტრუალურ ციკლს, ახდენს ნივთიერებათა ცვლის პროცესების სტიმულირებას, ეს ყველაფერი კი დადებითად აისახება სახის კანის მდგომარეობაზე.
კითხვა: რა დანიშნულებით გამოიყენება ქოქოსის ზეთის ნიღაბი?
პასუხი: ქოქოსის ზეთის 55 პროცენტს ლაურინის მჟავა შეადგენს. ის ხელს უწყობს ჭრილობებისა და კანის ნახეთქების შეხორცებას და, ამავდროულად, ებრძვის ბაქტერიებს. თუ სახეზე გაქვთ გამონაყარი ან მიმდინარეობს ანთებითი პროცესი, ქოქოსის ზეთის ნიღაბი მას ცოტათი შეამცირებს.