კითხვა: მაქვს სურვილი, მე თვითონ დავწერო ლოცვები და გამომდის კიდეც. შეიძლება თუ არა, ჩემი შეთხზული ლოცვებით ვილოცო, ამით ცოდვას ხომ არ ჩავიდენ?
პასუხი: შეგიძლიათ, წარმოთქვათ თქვენი შეთხზული ლოცვები მას შემდეგ, რაც დაამთავრებთ ლოცვით კანონს, ანუ იმ ლოცვებს წაიკითხავთ, რომლებიც წმიდა მამების მიერ არის დაწერილი. ერთ-ერთი ღირსი მამის სიტყვით, ადამიანის მიერ შეთხზული ლოცვა, როგორც ბავშვის ტიტინი, ისე სიამოვნებს უფალს.
კითხვა: შეიძლება თუ არა საეკლესიო ზეთის ცხება სხეულის უხერხულ ადგილებზე, მკურნალობის მიზნით?
პასუხი: სამკურნალოდ ზეთის ცხება სხეულის ნებისმიერ ადგილზე შეიძლება მხოლოდ უფლის რწმენის მქონე ადამიანისთვის.
კითხვა: რა ზიანის მომტანია თამბაქო ადამიანის სულიერებისთვის?
პასუხი: თამბაქოთი ბოროტი ძალა ცდილობს, გამოდევნოს ჩვენგან ღვთიური მადლი, რომელიც მიღებული გვაქვს წმიდა საიდუმლოსთან ზიარებით.
კითხვა: რა არის ბედნიერება ეკლესიური გაგებით?
პასუხი: ბერი ფილოთეოსი ასე ბრძანებდა: „ნამდვილი ბედნიერება – ეს მაღალი ჩინოსნობა და სხეულის განცხრომა როდია, ნამდვილი ბედნიერებაა – სათნოება. ისინი, ვისაც სურთ, სათნოებანი მოიხვეჭონ და მით აღასრულონ უფლის მცნებები – ჭეშმარიტად ბედნიერნი არიან“.
კითხვა: მართლა სჯის თუ არა უფალი უხამსი სიტყვებისა და ავი ფიქრებისთვის ადამიანს?
პასუხი: უსათუოდ სჯის, თუ ასეთ საქციელს არ აღმოფხვრით სინანულით, რწმენითა და ცხოვრების წესის შეცვლით. გავიხსენოთ მაცხოვრის სიტყვები: „ხოლო მე გეუბნებით თქვენ: ყოველი ფუჭი სიტყვისთვის, რომელსაც იტყვიან კაცნი, პასუხს აგებენ ისინი განკითხვის დღეს“ (მათე 12.36).
კითხვა: ყოველთვის უნდა ვთქვათ სიმართლე?
პასუხი: ვინც სიმართლეს დაფარავს, ცრუმოწმეს ემსგავსება, მაგრამ, უნდა სდუმდე, თუ სიმართლის თქმას უბედურება მოაქვს.