„შეიბნეს ვეფხი, მოყმეი…“

 მიუხედავად იმისა, რომ დღემდე ვერ გავარკვიეთ, რატომ გაიმართა ცემა-ტყეპა კორცხელის ერთ უღიმღამო საარჩევნო უბანზე; სამაგიეროდ, ლამის მთელი ევროპა მოიარა ამ დაპირისპირების კადრებმა და ცას მისწვდა ადგილობრივი თუ უცხოელი დემოკრატიის დამცველების ხმა: ქართული დემოკრატია საფრთხეშიაო.
მეტიც, კიდევ ერთხელ დასდეს ბრალი ქართველ სამართალდამცველებს, რომ დროულად და ეფექტიანად არ ირეაგირეს დაპირისპირებაზე და რისხვას ვერც ქართული სასამართლო გადაურჩა: მუშტებმოღერებული სპორტსმენებისთვის, რომლებმაც პოლიტიკოსებს დაარტყეს, 100-ლარიანი ჯარიმა მცირე სასჯელიაო.
ერთი სიტყვით, ხელისუფლებამაც დაიფიცა, რომ მგავსს აღარ დაუშვებს და არასახელისუფლო პოლიტიკოსებმაც დაგმეს ძალადობა. ოღონდ, ამასობაში, საკრებულოს წევრებმა, ბ-ნებმა ელისაშვილმა და მანჯავიძემ პირდაპირ ეთერში ისეთი მუშტი-კრივი გამართეს, კორცხელი მონაგონი იყო (პათოსით: ნუ გამახსენებ ლამისყანას).
ხოლო, რაკი არავის შემოუხევია ტანზე – პოლიტიკოსებს სცემესო და არც ქართველი სამართალდამცველები დაუდანაშაულებია ვინმეს უმოქმედობაში, სავარაუდოა, რომ ამ ქვეყანაში პოლიტიკოსის წმინდა ყბისთვის მუშტის შეხება მხოლოდ პოლიტიკოსის წმინდა ხელის უფლებაა?! –