ანუ, „ოჰ, ნეტავი ერთად იყოს ოდესა და ვილნიუსი“

 უკრაინის ტელევიზიის ეთერით ოდესის გუბერნატორი დაიმუქრა (მომყავს ციტატა): „წავალ ოდესაში და საზოგადოების მობილიზაციას მოვახდენ, მე ამის გადაყლაპვას არ ვაპირებ!“
„გადაყლაპვაში“ კი, არც მეტი, არც ნაკლები, ბ-ნი საყვარელიძის თანამდებობიდან გადაყენება იგულისხმა. ხოლო, ვიდრე დიდი რეფორმატორი ოდესელების მობილიზებას გეგმავდა, ლიტვის მმართველი პარტიის თავმჯდომარე (პარტიის სახელწოდებაა: „წესრიგი და სამართლიანობა“) როლანდას პაკსასი ლიტვისავე პრემიერ-მინისტრს შეხვდა და ლიტვის შინაგან საქმეთა მინისტრობის კანდიდატებზე ესაუბრა.
ასე განსაჯეთ, კანდიდატი ორია: ლიტველი დეპუტატი, ვინმე პოვილას გილისი და, თქვენ წარმოიდგინეთ, ოდესის ამჟამინდელი გუბერნატორი – მიხეილ სააკაშვილი.
ჩვენ არ ვიცით, ან კი ვინ გვეტყვის წინდაწინ, რომლისკენ გაუწევს გული ლიტვის პირველკაცს (საპირველაპრილო ხუმრობაც რომ არ იყოს), თუმცა თავად ბ-ნი სააკაშვილის ბიოგრაფიას ეს მომენტი ფრიად წაადგება. ბუნებრივია, ისიც უცნობია, რეალურად აპირებენ თუ არა ლიტველები თავიანთი სამართალდაცვის ჩვენი ნაპრეზიდენტალისთვის ჩაბარებას, მაგრამ არც ისაა გამორიცხული, რომ ბ-ნი პაკსასის მხრიდან ეს მაშველი რგოლი იყოს, ცხადია, ბ-ნი სააკაშვილისთვის ოდესურ ეპოპეაში იმიჯის გასამყარებლად, პათოსით – მეგობარი რისთვისო და, შავი დღისთვისო?! –