აწ უკვე საქართველოს პრემიერ-მინისტრი გიორგი კვირიკაშვილი 1967 წელსაა დაბადებული. მას აქვს ბაკალავრის ხარისხი მედიცინაში, რომელიც თბილისის სახელმწიფო სამედიცინო ინსტიტუტის დამთავრებით მოიპოვა; ასევე, ბაკალავრის ხარისხი ეკონომიკაში, რომელიც თბილისის სახელმწიფო უნივერსიტეტში მოიპოვა; 1998 წელს ილინოისის უნივერსიტეტში მოიპოვა მაგისტრის ხარისხი ფინანსებში. ბ-ნი კვირიკაშვილის შრომითი ბიოგრაფია 1993 წელს იწყება „გაერთიანებულ ქართულ ბანკში“ დოკუმენტური სავაჭრო ოპერაციების ოფიცრად, 1996 წლისთვის კი ის საკრედიტო დეპარტამენტის დირექტორის  მოადგილეა. 1996-1997 წლებში Trade Invest Bank – გენერალური დირქტორის მოადგილე იყო. 1998 წელს „გაერთიანებული ქართული ბანკის“ ბიზნესის განვითარებისა და ფილიალების ქსელის მართვის დირექტორად და აქტივ-პასივების მართვის განყოფილების დირექტორის მოადგილედაც იმუშავა. 1999 წელს სახელმწიფო კანცელარიაში გადავიდა ფისკალური, მონეტარული და საგარეო ეკონომიკური ურთიერთობის სამსახურის უფროსის მოადგილედ. 1999-2004 წლებში საქართველოს პარლამენტის წევრი და ეკონომიკური პოლიტიკის კომიტეტის თავმჯდომარის პირველი მოადგილე გახდა. 2004 წელს ამჟამინდელი „ტაოპრივატბანკის” აღმასრულებელი მენეჯმენტის კონსულტანტად დაიწყო მუშაობა (2006 წლამდე), 2006 წლის თებერვალში „ქართუ ბანკში“ გადავიდა და იქ 2011 წლამდე გენერალურ დირექტორად იმუშავა. 2012 წლის მარტ-ოქტომბერში ამერიკული საკონსულტაციო ფირმა „Lenzie Fisher Hendry LLC” – საფინანსო სექტორისა და საპენსიო რეფორმის ექსპერტი იყო; 2012 წლის 25 ოქტომბრიდან საქართველოს ეკონომიკისა და მდგრადი განვითარების მინისტრად დაინიშნა, 2013 წლის 26 ივლისიდან კი ვიცე-პრემიერობაც შეითავსა. ხოლო 2015-ში საგარეო საქმეთა მინისტრად დაინიშნა, თუმცა 2016-დან უკვე ქვეყნის პირველი პირია.
გიორგი კვირიკაშვილის მიერ პირველად შევსებული დეკლარაცია 1999 წლით თარიღდება, რომელიც მან შეავსო, როგორც კანცელარიის თანამშრომელმა.  ოჯახის წევრებად მიუთითა 1967 წელს დაბადებული მეუღლე მაია ცინაძე და სამი შვილი: 1991 წელს დაბადებული ანა, 1994 წელს დაბადებული ნინო და 1996 წელს დაბადებული ჯემალი. იმხანად ოჯახის ერთადერთ უძრავ ქონებას შეადგენდა 44 000 ლარად ღირებული საცხოვრებელი ბინა თბილისში, რომელიც გიორგი კვირიკაშვილს ეკუთვნოდა. სულ 1998 წლის განმავლობაში გიორგი კვირიკაშვილის სახელფასო შემოსავალმა 2 000 ლარი შეადგინა. ასევე, მიიღო ედმუნდ მასკის სტიპენდია 11 400 აშშ დოლარის ოდენობით. 2000 წელს დეკლარაცია პარლამენტის წევრის ამპლუაში შეავსო (ის დეპუტატი „მოქალაქეთა კავშირის“ პარტიული სიით გახდა) და ამავე დეკლარაციიდან ვიგებთ, რომ მის წლიურ შემოსავალს 1999 წელს 2 710 ლარი შეუდგენია. 2001 წლის დეკლარაციაში მისი შემოსავლები მითითებული არ არის. გიორგი კვირიკაშვილმა 2002 წელსაც, როგორც პარლამენტის წევრმა, ისე შეავსო დეკლარაცია. მისი ქონება და ოჯახის წევრთა რაოდენობა უცვლელია, თუმცა, როგორც პარლამენტის წევრს, 2001 წელს 7 980 ლარი აუღია, ხოლო, როგორც ლექტორს – 125 ლარი. 2002 წელს, როგორც პარლამენტის წევრმა, 9 000 ლარი აიღო, როგორც ლექტორმა, ისევ – 125. 2003 წელს მისი, როგორც პარლამენტარის, ხელფასი იგივე დარჩა, თუმცა, როგორც ლექტორს, ამჯერად 250 ლარი აუღია. 2005 წელს გიორგი კვირიკაშვილი დეკლარაციას ავსებს, როგორც ფინანსთა მინისტრის მრჩეველი, თუმცა დეკლარაციის იმ ფორმაში წინა წლის შემოსავლები მითითებული არ არის.
2012 წელს გიორგი კვირიკაშვილმა დეკლარაცია შეავსო, როგორც ეკონომიკის მინისტრმა. ოჯახში წელს მატება ჰქონიათ – 2007 წელს მეოთხე შვილი ნიკოლოზი შესძენიათ. მათი უძრავი ქონება კი შემდეგნაირია: გიორგი კვირიკაშვილის საკუთრება იყო ზოვრეთის ქუჩაზე საცხოვრებელი სახლი (190 კვ. მ.) და მიწის ნაკვეთი (432 კვ. მ.); საცხოვრებელი სახლი (250 კვ. მ.) და მიწის ნაკვეთი (3 450 კვ. მ.) ქვეშეთში, საცხოვრებელი ბინა თბილისში, სამგორის რაიონში (54 კვ. მ.). დეპოზიტზე თანხასაც მხოლოდ გიორგი კვირიკაშვილი ინახავდა – 20 300 აშშ დოლარს „თი ბი სი ბანკში“ და დეკლარაციის შევსების დროს ნაღდი ფულიც მხოლოდ მას ჰქონდა – 5 500 აშშ დოლარი. 2012 წლის განმავლობაში მან, როგორც „ქართუ ბანკის“ გენერალურმა დირექტორმა, 112 000 ლარი აიღო. 2011 წელს აღებული იპოთეკური სესხის მომსახურება 20 850 აშშ დოლარი დაუჯდა. ერთ-ერთი შვილის სწავლის საფასური კი – 7 000 ლარი. 2012 წლის განმავლობაში ბ-ნი კვირიკაშვილის სამინისტრო ხელფასმა 34 709 ლარი შეადგინა, სწავლის საფასურად კი კვლავ 7 000 ლარი გადაიხადა. ბოლო დეკლარაცია ბ-ნმა კვირიკაშვილმა 2015-ში შეავსო. უცვლელია მისი ოჯახის წევრთა და უძრავი ქონების ოდენობა. 2014 წელს, როგორც ეკონომიკის მინისტრმა, 81 250 ლარი მიიღო, ხოლო სწავლის საფასური 9 600 ლარი დაუჯდა.