კითხვა: ითვლება თუ არა ტატუს გაკეთება ცოდვად?
პასუხი: ქრისტიანული ეკლესია მოსვირინგებას უარყოფითად უყურებს. ადამიანის სხეული ღვთიური ქმნილება და სულის ტაძარია და არა სურათების ალბომი. სვირინგი ველურ წარმართებში იყო გავრცელებული და წარმართულ წეს-ჩვეულებებს უკავშირდებოდა.
კითხვა: როგორ უნდა მიიღოს ქრისტიანმა ის ფაქტი, რომ ყოველ ღამით ესიზმრება გარდაცვლილი ახლობლები?
პასუხი: ქრისტიანმა ეს შეიძლება მიიღოს როგორც შეხსენება  და მეტი გულმოდგინებით ილოცოს გარდაცვლილთა სულებისთვის.
კითხვა: ნებადართულია თუ არა საერო პირთათვის სახლის პირობებში საკმევლის კმევა? მითხრეს, რომ საკმევლის კმევა მხოლოდ მაშინ არის შედეგიანი, როდესაც მას მღვდელმსახური ახორციელებს.
პასუხი: საკმევლის კმევა კარგია იქ, სადაც არის ეშმაკის მოქმედების კვალი. ამდენად, საჭიროების შემთხვევაში, ეს საეროთათვისაც დასაშვებია. მაგალითად, საკმევლის კმევა კარგია სულიერი ავადმყოფობის დროს.
კითხვა:  ახლობელმა, რომელიც უკეთურად არის ჩემდამი განწყობილი, მაჩუქა ხატი. არ მსურს მისი საჩუქრის დატოვება, მაგრამ, ხატისადმი მოწიწების გამო უკან ვერ ვუბრუნებ. როგორ მოვიქცე?
პასუხი: ხატი დაიტოვეთ და ღმერთს შეავედრეთ ეს ადამიანი. უსურვეთ მას ყოველივე სიკეთე და სთხოვეთ უფალს, გაუნათოს გონება, რათა შეიცვალოს თქვენდამი დამოკიდებულება.