საქართველოს აგერ უკვე მესამედ პარლამენტის წევრი „ნაციონალური მოძრაობის“ პარტიული სიით შოთა მალაშხია 1962 წელსაა დაბადებული. უმაღლესი განათლება თბილისის სამედიცინო ინსტიტუტში მიიღო. კვალიფიკაციით ექიმია, მისი სპეციალობა კი სამკურნალო საქმეა. ბ-ნი მალაშხიას შრომითი ბიოგრაფია 1979 წელს დაწყებულა 26 კომისრის რაიონის ბინათმმართველობაში, სადაც მუშად 1980 წლამდე იმუშავა; 1980-1981 წლებში 132-ე ტექნიკურ სასწავლებელში სწავლობდა; 1981-1982 წლებში კი თბილისის ტრამვაი-ტროლეიბუსის სამმართველოს ელშემკეთებელი იყო. 1983 წელს სამედიცინო ინსტიტუტში ჩააბარა, რომელიც 1989-ში დაამთავრა. დამთავრებისთანავე რესპუბლიკურ ცენტრალურ კლინიკურ საავადმყოფოში დაიწყო მუშაობა ექიმ-ინტერნად (1990 წლამდე); 1991-1998 წლებში კი მეორე პოლიკლინიკის ლაბორანტად მუშაობდა; ხოლო 1999-2003 წლებში – იმავე პოლიკლინიკის ექიმ-ნევროპათოლოგად. 2004 წელს საქართველოს პარლამენტის წევრი გახდა და საქართველოს ტერიტორიული მთლიანობის აღდგენის კომისიაც ჩაიბარა. პარლამენტის წევრი 2008-შიც გახდა (ახლახან ხსენებული კომისიის თავმჯდომარეც) და ახლაც გახლავთ 2012 წლის მოწვევის დეპუტატი.
შესაბამისად, ბ-ნმა მალაშხიამ თავისი პირველი დეკლარაცია 2005 წელს შეავსო, როგორც პარლამენტის წევრმა და ოჯახის წევრებად მიუთითა მეუღლე, ფატი ანთაძე, სამი შვილი  – ლუკა, მარიამი და მათე და სიდედრი, ქ-ნი ნელი შენგელაია. უძრავ-მოძრავ ქონებას მხოლოდ ნევროპათოლოგი დეპუტატი ფლობდა: კერძო საცხოვრებელ სახლს თბილისში, ფილიას ქუჩაზე, 100 000 ლარად ღირებულს და 10 000-ლარიან ავტომანქანა „ფოლკსვაგენ პასატს“.  დეკლარაციის შევსების მომენტში ნაღდი ფულიც მხოლოდ მას ჰქონდა – 7 000 აშშ დოლარი. იმხანად სიდედრს, ქ-ნ ნელის მილიონლარიანი ხელშეკრულება ჰქონდა გაფორმებული სახლის მშენებლობაზე.
რაც შეეხება შემოსავლებს: 2004 წლის განმავლობაში შოთა მალაშხიამ, როგორც პარლამენტის წევრმა, 17 070 ლარი აიღო; ხოლო მისმა მეუღლემ, როგორც თსუ-ის ირანული ფილოლოგიის კათედრის დოცენტმა – 840 ლარი.
ბოლო დეკლარაცია ბ-ნმა მალაშხიამ 2015-ში შეავსო, როგორც, ასევე, პარლამენტის წევრმა და ოჯახის წევრებად მიუთითა მეუღლე და სამი შვილი. რაც შეეხება უძრავ ქონებას: შოთა მალაშხიას საკუთრებაა ზემომითითებული საცხოვრებელი სახლი თბილისში, ფილიას ქუჩაზე (190 კვ. მ. ფართობის); ასევე: მიწის ნაკვეთი იმავე მისამართზე (615  კვ.მ.); ბინა თბილისში, ქობულეთის ქუჩაზე (243 კვ.მ.); საცხოვრებელი ბინა ხელვაჩაურის რაიონის სოფელ გონიოში (76 კვ.მ.); მიწის ნაკვეთი წალენჯიხის რაიონის სოფელ ნაკიფუში (12 509 კვ. მ.); კიდევ ერთი მიწის ნაკვეთი სოფელ ნაკიფუში (136 552 კვ.მ.) და მესამე ნაკვეთიც – 50 151კვ. მ. ფართობის. ფატმან ანთაძე-მალაშხიას კი ეკუთვნის 600 კვ. მ. მიწის ნაკვეთი თეთრი წყაროს რაიონის სოფელ ამლევში და კიდევ ერთი ნაკვეთი ოზურგეთის რაიონის სოფელ ურეკში (133 კვ.მ.). ბ-ნ მალაშხიას კი ჰყავს 2005 წლის „ფოლკსვაგენ პასატი“.
დეკლარაციის შევსების მომენტში ნაღდი ფული მხოლოდ დეპუტატს ჰქონდა – 50 000 აშშ დოლარი.  2014 წილს განმავლობაში ბ-ნი მალაშხიას სადეპუტატო ხელფასმა 60 285 ლარი შეადგინა, მისი მეუღლის საპროფესორო შემოსავალმა კი – 18 000 ლარი.
რაც შეეხება დანარჩენ წლებს: 2005 წლის განმავლობაში ბ-ნმა მალაშხიამ, როგორც პარლამენტის წევრმა, 20 491 ლარი აიღო, მისმა მეუღლემ – 1 800; 2006 წელს – 26 400 ლარი, მისმა მეუღლემ – 4 750 ლარი; 2007 წელს – 29 069 ლარი, მისმა მეუღლემ – 2 500; 2008 წელს შოთა მალაშხიას შემოსავალი 46 329 ლარი იყო, მისი მეუღლის – 3 000 ლარი. 2009 წელს – 50 046 ლარი, მისი მეუღლის – 7 200 ლარი; 2010 წელს – 53 092 ლარი, მისი მეუღლის – კვლავ 7 200 ლარი; 2011 წელს – 53 006 ლარი, მისი მეუღლის – 7 200 ლარი; 2012 წელს – 56 745 ლარი, მისი მეუღლის – 9 600 ლარი; 2013 წელს – 60 285 ლარი, მისი მეუღლის – 12 000 ლარი.