კითხვა: ვარ 4 თვის ორსული. ყველაფერი კარგად მიდის, გარდა ერთისა – მთელი ფეხმძიმობის განმავლობაში კანზე მაქვს წვრილი გამონაყარი და თან ძალიან მექავება. როგორ მოვიქცე?
პასუხი: ორსულობის პერიოდისთვის უცხო არ არის გაღიზიანება, ქავილი და გამონაყარი. ამ დროს ორგანიზმში უამრავი პროცესი მიმდინარეობს, რომლებიც ყოველთვის დადებითად არ მოქმედებს კანზე. ყოველი შემთხვევა ინდივიდუალურია, ამიტომ, შეუძლებელია, ასე ზეპირად მოგცეთ რჩევა. მიმართეთ გამოცდილ კოსმეტოლოგს.
კითხვა: ბევრჯერ დამიცავს დიეტა, მკაცრიც, ნაკლებად მკაცრიც და თითქმის ყოველთვის მიმიღია სასურველი შედეგი, თუმცა ამ შედეგს დიდხანს ვერასდროს ვინარჩუნებ, ანუ, გარკვეული პერიოდის შემდეგ ძველი წონა „მიბრუნდება“. რას მირჩევთ?
პასუხი: პირველ ყოვლისა, აუცილებლად უნდა შეცვალოთ თქვენი კვებითი ჩვევები. დაბალკალორიული კვების პროგრამები დაგეხმარებათ, გადაერთოთ ახალ ტალღაზე და გადახედოთ თქვენს ყოველდღიურ რაციონს იმ თვალსაზრისით, რომ, სასურველი წონის მიღწევის შემდეგ განაგრძოთ ჯანმრთელი კვება, აქტიურად ივარჯიშოთ და ეს რეჟიმი თქვენი ცხოვრების წესად აქციოთ.